埃及識得殺牛祈福，其他非洲隊又點會袖手旁觀呢？好似8強分子喀麥隆喺90世界盃8強對英格蘭，就被踢爆向比賽用波施巫術；02世界盃更有11位身份不明職員隨隊，懷疑都係巫術高手。
今屆賽事分組賽被淘汰嘅塞內加爾，02世界盃分組賽擊敗法國並晉身16強，當時有報道指該隊賽前殺雞施法。照咁睇嚟，塞內加爾今次無緣8強，好大機會都係巫術唔夠安哥拉犀利喎！
哥高查救波前放尿
非洲巫術不但可以現場施法，聽講仲可以超地域進行。近年，非洲同國際足協分別禁止巫師隨隊參賽，據講尼日利亞同南非就派人喺國內施法。南非今次入唔到8強，尼日利亞就順利晉級，可見後者國內嘅巫術行業，先進過南非好多。
大家咪以為非洲係落後地區，因此特別多騎呢嘢。阿根廷門將哥高查90世界盃成為12碼撲救王，據講就係佢偷偷喺禁區內「小便」，結果一陣「尿味」搞到對手射波失準。