鄭大班籌辦新電台，俾人批評為富貴名嘴搞電台，無助民主。一啲人以為自己永遠站在理想一邊，代表民主正義，生意人就係資本家，政客、官商勾結，大罵特罵。究其實，呢類人只係死牛一便頸，永遠屬於少數人之中嘅少數，做實事往往一事無成，做理論學問就交白卷，莫講話寫唔出傳世之作，就算寫本紮實嘅政治論叢，仍然唔見得有料到，只能在報紙寫吓專欄，以罵人為過癮，不過罵得多了無新意，就無人重視，只會趕走讀者。
民間電台與商人資本家辦電台，層次不同。在香港辦FM台，無錢不行，淨係建立發射站，行內人話已要五千萬元，加上購買生財設備，營運資金，非過億元莫辦。阿牛等人其實知道自己無力辦一個有規模嘅民間FM電台，佢哋唯一嘅資產就係自己把聲音，如果政府送條FM頻道畀佢哋，只會累佢哋破產，如果佢哋攞咗條頻道而用「土法煉鋼」方式經營，就係誤用社會資源，要俾《蘋果批》痛批。阿牛一類人要爭取嘅，其實最好係在官府電台頻道之中，選一條畀佢哋，等阿牛淨係帶把聲音入播音室，暢所欲言，實際經費由納稅人津貼。如果現時港台唔肯，他日正式有數碼廣播，頻道多到冇人要之時，政府可以將多餘嘅頻道拎出嚟，俾民間機構競投（社會主義派會建議用抽籤方式），形成多個民間電台。根據外地經營，有宗教背景嘅機構，因為財雄勢大，實會佔盡上風，將阿牛一類人擠出來。
資本家辦商營傳媒（包括電台）最緊要以賺錢為原則，不以政治金錢津貼為本。資本家辦報（例如《蘋果》），對香港爭取民主，有正面作用。相反地，一啲報紙素來打着旗號為人民服務，愛國愛黨，不遵從市場導向，其言論就會反對民主普選。富貴名嘴鄭大班搵埋咁多名人集資搞電台，究竟以資本家原則（賺錢）為重要吖，還是以愛國愛黨為重要呢？你哋諗吓嘞！民間電台其實並非一定要有政府牌照不可，現今互聯網科技可以使到人人在屋企開電台，遠在北美歐洲亦可用電腦收聽。不過在選舉年做吓騷，乃指定動作，冇所謂之至。