用咗大約兩個鐘頭嘅時間，終於跑完由酒店去到Canpardo賽車場嘅82公里路程，然後就轉坐大會安排嘅車，直接去到用嚟俾我哋測試配用6前速款式DSG波箱嘅場地。
稍為休息咗一陣之後，就跳上一部白色、配備咗6前速DSG波箱嘅GolfGT車廂，跟隨工作人員嘅指令駛入賽道；但呢條賽道並唔係普通嘅圈形賽道，而係由九曲十三彎嘅山路組成，直路唔算太多，而喺好幾個彎位之前，大會仲加咗用作提醒前面有急彎嘅雪糕筒，並且要走「沙林」避開，夠晒刺激！開初跑第一個圈嗰陣仲未熟悉賽道，搞到頻頻出醜於人前，後來熟習咗邊個位落Brake、邊個位扭軚入彎，就即刻覺得勁好玩，係咁肆意往前跑，爽呀！
記者、攝影：鄭達基