超級星期天點可以冇我求驗客？同平時唔同，逢禮拜日我會少啲批判，同大家分享多啲得意新聞，等大家睇得過癮。
非洲國家盃打到8強階段，名副其實係你生我死嘅時刻，於是非洲人點樣求神祈福，亦成為好有趣嘅新聞。好似將會喺周一大戰安哥拉嘅埃及，上周五就現場表演「劏生牛」，希望獲得真主保佑！不過喺呢度先警告大家，以下內容可能引起讀者不安。
埃及國教係伊斯蘭教，呢個以符號、動植物代表神嘅國度，牛係屬於神獸，孟菲斯地下神牛廟就係重要古蹟之一；每年伊斯蘭曆12月10日，更係古爾邦節（宰牲節），當天埃及人要着新衫宰牛殺羊，之後再將肉分畀其他人食。
擺啱方位手起刀落
上周五，埃及訓練場外面亦上演劏牛儀式，包括圍觀嘅共有二十幾人參與。當時約7名着住波衫、踢住拖嘅職球員，夾手夾腳綁住牛腳，並以頭向南、尾朝北、面靠西嘅姿勢，將佢㩒喺地上，同時吱吱朕道：「刀泰史咪椰，阿拉乎埃克巴（以阿拉之名，阿拉至大）！」突然間，一個肥佬手起刀落捅入牛頸，隻牛痛極出盡吃奶之力，擺頭、起蹄、拋尾……
好可惜，隨住牛血流到一地都係，佢亦好快安靜落嚟！之後1名身穿17號球衣嘅阿密特哈辛，移動利刀作鋸物狀，期間19號嘅沙基同9號嘅穆罕默德施丹呢兩名前鋒，就好似入完波咁開心，猛用手摸個牛頭，希望對安哥拉有「士哥」。10分鐘過去，牛頭同身僅剩皮肉相連，現場亦留下一灘血迹，整個血腥儀式亦告一段落（由於篇幅所限，分肉過程恕不嘮叨！）
拜神燒豬成隻上
啲人好殘忍？隻牛好可憐？呢啲只不過係CultureShock（文化衝擊）啫。好似我哋拜神最鍾意切燒豬（仲要成隻上），啲鬼佬睇見豬眼同豬鼻，都會覺得好恐怖喇！係咪？希望埃及球員祈福之後，周一順利擊敗安哥拉，等呢隻白色帶黑點嘅牛牛，唔好白白犧牲就好喇！