珠江船務（560）由上年6月過3蚊高位，插低超過50%，每股淨現金比率高達50%，可以諗諗。珠船上年6月揸住現金近6.3億銀，又無借貸，每股淨現金高達0.7元，係現價（1.38元）50%。淨現金比率上到咁高水位，呢隻現金牛擋風擋雨嘅能力已經加強。
又珠船主打客貨運業務，07年上半年度（6月底止）純利穩升12%至6380萬銀。就當全年度純利，都係維持呢個增幅到1.36億銀，PE都係講緊8字頭。再講，12月底報載，珠船阿媽仍然有4個內河碼頭，預期注入上市公司。雖則注資未有時間表，但珠船管理層就話，公司市價PE若在10倍樓下，不利體現碼頭資產價值。中線睇，珠船係有注資概念，但肯定唔係呢個殘價位。買珠船，要長、短打，一轉走短線，博珠船上番10倍PE，股價要見1.65元，潛在回報率20%；另一轉玩長線，就等珠船注資。
國中有人溢價換股
國中（202）上個星期尾發公告，話集團1月份內，接獲兩份本金額1億銀嘅可換股票據換股通知。呢批票據轉換股數，高達10億股，佔已擴大股本5.7%，晒士唔講得笑。以票據換股價0.1元計，國中現價（8.1仙）要升23%，承兌人至打和。而1月以嚟，國中大部份時間低企0.1元之下。又國中P/B跌到得番0.8倍，水務股當打，國中呢個P/B亦係殘到不得了。呢轉短打，就以國中票據兌換價做目標，已經有魚有肉。