教院噚日搞嘉年華會籌款，新校長張炳良宣佈好消息，研究與發展中心總監鄭燕祥將出任署理副校長，專責研究同發展工作，校方遴選委員會就會全球招聘副校長，其間鄭教授身兼兩職。
舊年教院風波，教育局（前稱教統局）前常秘、剛做咗人大嘅羅范椒芬，被指點名要炒嘅四名教院學者，鄭燕祥榜上有名，當年冇被郁捱到今日終於標尾會，可喜可賀。
鄭教授噚日心情甚好，同八方講會繼續敢言，因為教育局最終接納佢嘅批評，證明佢冇講錯。至於鄭署理副校長有冇機會坐正呢？暫時唔知道。教院噚日總共籌到26萬，張炳良用咗8,008蚊投得校友司徒華嘅一副對聯，「隨風潛入夜，潤物細無聲。」