每個人心中都有座斷背山，馬會行政總裁應家柏座斷背山應該喺澳門，佢對澳門賭場嘅挑戰好上心，一日到黑講住點樣力抗澳門賭業來犯，每次見到八方都鼓其如簧之舌hardsell香港馬，又每次都畀佢諗到新point。
八方噚日請教佢，澳門威尼斯人佔地大過沙田馬場，豪華程度贏成幾十萬倍，香港馬會憑乜同人鬥呢？應家柏承認喺豪華程度方面，馬會要認矮仔，但香港馬場唔係瓣瓣都輸畀賭場，「威尼斯人擁有好大幢建築物，但係老實講，嗰度所有嘢都係假嘅！相反，賽馬係真實嘅，你唔會困喺間房度，永遠唔知道時間。佢哋有CelineDion，我哋都有全世界最精銳嘅戰馬。」應家柏一語道破，香港同澳門博彩業係一場真假之爭，佢有佢道理，八方只怕賭仔眼睛冇佢咁雪亮啫。