近日最令港人關注的新聞，莫過於有人接二連三於互聯網上發放貌似陳冠希（Edison）和舊愛陳文媛、緋聞女友鍾欣桐及張栢芝的淫照，牽涉在內的人越來越多，令不少藝人都擔心自己會否是下個受害者。同樣身為藝人的官恩娜（Ella）前晚出席《蘋果》網站直播節目《娛樂開CHAT》時，直言並不擔心自己的私人照片流傳於網上，因為她清楚知道要對自己的行為負責任，亦絕對不會拍此類照片。
Ella於節目中除了談到工作和感情事外，更即場獻技，用氣球扭出不同的公仔。得到沙田的網友Jack的讚賞，更因此產生興趣，想學扭氣球公仔。最後，更因這一讚賞，被Ella選為整晚表現最好的讀者，獲得她早前到荷蘭工作時，於紅燈區買回來的玻璃杯一對。大家可登入《蘋果》網站 http://ent.appledaily.com隨時重溫節目。
採訪：林惠卿 攝影：陳俊強 服裝：MissSixty
強吻事件漸淡忘 旺角高小姐
高小姐：我之前喺報紙見到你俾個男士強吻單嘢，因為我都係女仔，如果換咗係我，我會好驚，我想問吓當時在台上嘅心情係點？
Ella：我當時係呆咗，但我喺台上面又唔可以反應過激，要強作鎮定落返後台，其實件事都發生好一段時間，𠵱家都要好刻意回想先會想起係點樣。
高小姐：我見你都會接受傳媒的訪問，你對住有線嘅時候係講國語，你覺得TVB強制你用國語接受有線訪問恐怖啲，定係強吻你恐怖啲？你當時咁驚，點解仲會記得講國語？
Ella：首先我覺得兩件事係好唔同範疇嘅嘢嚟，用國語接受訪問都幾好，可以畀我練習吓國語。另外，我接受訪問係事後嘅事情，我係隨時都可以講國語的，而且我身邊嘅同事都會提我，都會幫我，順便喺呢度多謝我公司嘅同事。
為自己行為負責 沙田Jack
Jack：你上一隻唱片已經係年幾前，想問吓下一隻唱片幾時會出，又會以乜嘢風格出呢？
Ella：希望年中可以出到，其實𠵱家已經同音樂人傾緊，希望可以快啲啦！我自己都好心急，都多謝你有留意。
Jack：係呀！我一直留意你隻唱片，但等咗好耐都未出到。另外，最近有疑似某藝人嘅裸照擺咗上網，你有冇擔心自己嘅私人照流咗出來？
Ella：雖然我講嘢有時都幾儍更更，但我好清楚自己做嘅嘢要負責任，同埋好清晰知道自己做緊乜。其實我唔係成日都儍儍哋，只不過我覺得有時做人唔需要太過執着，唔需要繃到成個人緊晒。我唔擔心，因為我都冇影過，亦唔會驚。
唱歌拍劇皆鍾愛 何文田Tom
Tom：Ella，我有睇過你拍劇同聽過你唱歌，你自己鍾意拍劇定唱歌多啲呢？
Ella：我鍾意唱歌多啲，拍劇其實同唱歌都幾近，不過唱歌就係將一啲歌詞用聲音演繹出嚟，而劇就係有埋動作同聲音，我兩樣都好鍾意。
Tom：拍劇又要背台詞，唱歌又要練歌，你認為拍劇辛苦啲，定係唱歌辛苦啲呢？
Ella：其實我覺得兩樣都唔辛苦，因為兩樣都係我鍾意做嘅工作，但兩樣嘢相對嚟講，拍劇會略為辛苦少少，因為要捱更抵夜，有時辛苦到係幾夜都冇得瞓，係攰到企喺度都可以瞓着。
Tom：咁你繼續努力啦！我會繼續支持你拍嘅劇㗎！
表演小八卦：自學扭氣球唔驚爆
官恩娜這次為讀者表演扭氣球公仔，即場扭了隻貴婦狗和一隻攬住花朵的熊仔，她透露小時候見到別人扭氣球公仔，覺得很得意，所以自己買書自學。
Ella扭公仔的時候氣球不停發出「吱吱」聲，她說很多女孩都害怕這種聲音，而且扭的時候經常會爆波，Ella表示成功扭到公仔的竅門就是不能害怕，她說：「驚爆就一定會爆，只要大膽咁扭落去，就扭得成。」
