花旗股市喺聯儲局減息半厘之後市況反覆，前晚先插後抽，道指升咗兩百，不過市場氣氛冇乜大改善。
信貸評級機構標普調低總值4.2萬億港元嘅次按債評級，金融機構嘅虧損將大幅增加，全球最大債券保險商MBIA上季蝕179億元，主席話「有信心」AAA評級可以保得住，不過，標普就唔係咁諗，佢哋話會將MBIA列入負面觀察名單，如果MBIA撲唔到水增大資本額，佢哋會考慮調低MBIA嘅評級。大家諗吓，仲有乜嘢人會願意又有能力泵水入MBIA同埋其他債保商？佢哋主席嘅「有信心」可能好快就俾人拆招牌，不過，唔使等到嗰陣，花旗股市會以呢個憂慮做藉口插番轉頭。
唔使等嘞，渣打前晚已經話會向旗下兩間SIV注資超過500億元，睇嚟好多銀行𠵱家都撲緊水，遲啲大家就會見到陸續會有公佈。
港股昨日上晝反覆，晏晝突然掃上，恒指挾破2400關收市，主要係挾住六行三保，淡友就質住啲地產股，六行三保仲未有條件轉勢，應該只係玩挾倉，下禮拜隨時質番轉頭。
中電信破位可見6.6元
中電信C輪9666：中電信（728）昨收5.82元，成交雖然冇增加，但睇個勢應該會上試6元，破位睇6.60元，可以諗吓隻C輪9666。隻輪昨收84仙，槓桿率6.9倍（有效4.2倍），正股升上6.60元，9666應該喺1.35元樓上，有60%升幅，正股跌穿5.50元止蝕。