雖然有關唱片公司SillyThing重組的新聞已傳出個多月，更有指部份歌手將退居幕後或轉職，但身為其中一分子的麥浚龍（Juno）似乎未受影響，其新大碟《Wordsofsilence》剛剛推出，還為此拍攝一部音樂短片。片中Juno奉獻其螢幕初吻之餘，更首次抽煙，一吸便吸600支﹗
麥浚龍用了半年時間籌備新大碟《Wordsofsilence》，碟內全是慢歌，Juno還用菲林拍了一套長達20分鐘的音樂短片，更奉獻了兩個第一次和兩大挑戰。
立即洗澡辟味
Juno說：「首先我同女主角kiss，呢個應該係我嘅螢幕初吻，另一個第一次就係要我食煙，我由細到大一支煙都未食過。我同女主角冇乜對白，成個古仔就係話我哋用食煙呢個方法去溝通，結果我哋兩日內食咗600支煙，咁當然唔係成支吸晒，有時係點起支煙就算。」
非煙民的Juno每完成工作，便第一時間返家洗白白，去除身上的臭煙味，苦不堪言。
捱摑打鬆牙骹
除了變成抽煙機械外，Juno還面對另外兩大挑戰，就是極速鯨吞勁辣麵和捱摑。導演要求他一take過拍畢吃麵鏡頭，但吃之前卻要倒入大量辣醬，認真大整蠱，Juno笑謂：「呢個鏡頭我要一口氣食晒成碗麵，total拍咗四次，拍完到𠵱家我冇再食過公仔麵，真係有好大陰影！」至於被女主角掌摑那場戲，事前Juno主動要求女方不用留力，結果這個鏡頭拍了兩次，他笑言：「牙骹都俾佢打鬆﹗」
早前Juno所屬公司SillyThing重組，旗下不少歌手暫時出碟無期，惟獨Juno有機會出個人大碟，四月還將與軟硬天師合作推出單曲，年尾又推出另一個人大碟。Juno謂不怕被指公司偏待他，他說：「公司有幫其他歌手接job，我知道艾粒嚟緊都會有新project，所以呢啲傳聞唔需要理。」
採訪：李珮洳 攝影：陳偉權
化妝：Raymond@MaeVonMakeupInstitute
髮型：EdmondLeung@PrivateISalon(IFC)
場地提供：TailLemongrass
