農曆新年將至，現時大部份年輕人慶祝新歲，不外乎看電影或相約一班朋友行年宵，甚至是打麻雀一發新年財。不過張繼聰、謝安琪、張詠恩、Oscar、DJ細蘇及阿Wing等，今年則各斥資5位數字製作了一個月曆，在年宵攤檔義賣幫助匡智會的兒童，認真有意義。
張繼聰（Louis）、謝安琪、張詠恩（Jan）、Oscar、DJ細蘇及阿Wing六位好朋友，早於大半年前已開始計劃在農曆新年競投一個年宵攤位，不過他們不是要賣吹氣兵器或印有恭賀字句的內衣褲，而是要推出一個慈善月曆，更會將所有收入不扣除任何成本捐給匡智會，他們更為這個組合起了一個名JepJep。
號召歌迷齊行善
Louis說：「JepJep其實係指食嘢時發出嘅聲音，我哋幾個好朋友成日都會約埋一齊食嘢，於是就成立咗JepJep，繼而諗到一齊影一個月曆用嚟義賣幫人。」Oscar表示當大家決定要在年宵攤檔擺賣時，他於競投攤位當日便擔當了重要的角色，他說：「競投嗰日我係負責去舉手叫價嘅，其他人都要返工，得番我同另一個朋友去，開始叫價時我都好緊張，又唔可以用太多錢去投，但係又怕投唔到，於是我一路舉手一路打電話問住佢哋仲出唔出高啲價，最後都畀我投到。」
至於阿Jan則認為藝人可以用本身的號召力，呼籲歌迷多做善事，所以她十分支持今次慈善月曆義賣，她說：「新年係一個開開心心嘅日子，我哋幾個嘅生活已經好好，我哋都想將開心帶畀冇咁幸福嘅人，相信今年新年係最有意義嘅一年。」
設計印刷一腳踢
Louis又謂之前大家誤會他們會賣T恤及Cap帽，他說：「其實啲Tee同帽係身邊朋友免費設計送畀我哋做制服，年宵嗰度只係賣月曆，如果到時反應好，fans又想出錢做善事，咁就可能會搞個影相簽名會，將啲錢捐埋出嚟。」最後Oscar表示今次合作過程中，大家有很多得着，由設計、印刷及選色方面都要親力親為，而在討論過程中遇上意見分歧，就會以投票形式決定。阿Jan指若今次JepJep義賣月曆反應理想，日後他們會繼續幫助其他團體。
採訪：李珮洳 攝影：陳偉權
髮型：Jobby@HairPeace（張繼聰）
