今個月雖然係農曆新年，不過日本新Games陸續有來！各位Wii機主今個星期就最唔得閒，因為等咗好耐、一再推遲嘅《大亂鬥SmashBrothersX》終於有貨。呢隻大鬥亂之所以咁出名，除咗會有任天堂旗下角色外，更請埋SEGA超音鼠同KONAMISnake過來參戰，非常難得，一出即炒上$580！
記者：許福合
記得更新
《大亂鬥SmashBrothersX》係Wii版嘅遊戲，不過留意玩遊戲前，記得先將Wii更新至最新版本，否則就可能玩唔到！遊戲玩法其實非常簡單，基本規則係只要將對手擊出場外就可以拿到分數，而每名角色都會有SmashAttack及必殺技能，整個戰鬥過程簡單，可以話繼承任天堂遊戲傳統，容易上手，不過要練到達人級精通水平，亦有唔少技術可以慢慢鑽研，耐玩度高。
角色爆棚
《大亂鬥》系列一向都係任天堂角色大派對，著名遊戲角色都會喺遊戲上出現。今次新作除咗集合《瑪利奧》、《金剛》、《薩爾達》等名作角色外，最特別係加入SEGA同KONAMI嘅超音鼠同Snake於遊戲上，總數有超過35名角色登場。
遊戲內每名角色都具備多種攻擊招式或特別技能，當然亦唔少得因應該角色而設計的必殺技及終結技能。以SEGA超音鼠為例，就擁有變身能力，變身後全身化為金色，移動速度會大為提高，並且跟原來遊戲一樣，可以撞擊對手，加上有一定飛行能力，操作簡單得來可以有唔少變化。除咗技能多多外，其實連角色外觀，用家都可以自己話事，如Wario除咗穿上《MadeInWario》衣衫外，仲有多款衣服顏色可以更換。
道具搞嘢
除咗利用角色本身特有技能外，遊戲內會出現多個唔同戰鬥場景同特別道具，玩家只要靈活運用它們，分分鐘可以扭轉敗局！首先不能不提任天堂遊戲經常出現蕉皮！只要喺適當時間放到地上，可殺對手一個收掣不及踩上倒地，然後任你魚肉。炸彈亦係常見道具，只要投擲後一定範圍內敵人都有損傷，命中率高，相當好用。最後要提就係終極道具SmashBall，只要將SmashBall外殼打碎，角色就能使用最強必殺技能，令對手幾乎無還手之力，不過若被對手攻擊奪走SmashBall，就只有等着硬捱一下重擊。
Profile
主機：Wii
廠商：任天堂
類型：動作遊戲人數：1-4人
售價：$580
查詢：i-Gamer（27253338）
