筋肉Defender　拖6噸車晒扭力

一向以硬朗形象見稱嘅LandRoverDefender，唔單止面對崎嶇前路同大斜都難佢唔倒，但勢估唔到佢扭力勁到拖得郁成6噸重嘅拖頭！代理日前舉行新一代Defender發佈會嗰陣，就特別示範咗一次筋肉擂台，將一部貨櫃拖頭拉住走，全程無標煙、無響胎、無兩頭「撩」，施施然咁拖住人哋行，扭力之勁可見一斑。

記者：鄭達基
攝影：陳陶鈞

新偈力大　符合EuroIV

新版LandRoverDefender可以輕鬆咁拖動一部淨重6噸嘅貨櫃拖頭，設喺車頭嘅一台全新2.4公升直4柴油Turbo引擎，可以話功不可沒。雖然佢嘅馬力輸出數值只有90kW，同一部配用2.0公升汽油引擎嘅私家車相差無幾，甚至嚟得仲要低，但扭力輸出數值卻高達360Nm，並且可以喺引擎處於2,000rpm時全數輸出，除咗到可以好輕鬆起步加速，又或者攀爬斜度嚇人嘅斜坡外，要拉動一啲隨時比部車本身高一截嘅重物，話都無咁易就搞掂！

1.車尾油缸入口旁有柴油標貼，唔怕入錯油。

2.波箱繼續係6前速手動設計，操作充滿原始機械感。

另外值得一提嘅係，呢台引擎仲符合最新嘅EuroIV環保條例，加上以柴油作燃料，唔只可以減低廢氣排放，有助改善環境之外，喺今日呢個油價高企嘅日子，都可以幫你荷包慳唔少。

3.全新2.4柴油Turbo引擎好力兼符合EuroIV環保規格。

高扭力四驅　啱劈山路

Defender一直以來嘅另一個賣點，就係佢所配用嘅四驅系統，配合獨特懸掛設定，令車子可以從容不迫嘅姿態，去應付嗰啲崎嶇不堪嘅路段。然而，今次到港嘅新車配備高扭力四驅之餘，仲換埋全新嘅6前速手波，揸佢去爬山更加得心應手。

4.從車尾望過去，Pickup版嘅Defender仲有型過Wagon版。

講番外觀，嚟到大家眼前嘅呢部新一代型號，硬繃繃嘅車身線條仍然得到保留，而頭尾燈鋪排亦都繼續以簡單易讀嘅陳設示人；不過，由於呢部係Pickup版，所以加裝咗尾斗嘅軟篷頂之外，仲因為佢係單Cab雙座位設計，唔使好似StationWagon版咁要封尾窗，型仔好多㗎！

5.頭燈陳設同舊版無太大分別，繼續以照明度高做號召。

6.胎軨尺碼係16吋，設計仲好襯Defender，一樣咁型！

7.尾燈陳設勝在簡單同透光度高。

8.StationWagon嘅Defender大家肯定見得多，Pickup貨車版你又見過未？

尾斗夠大　搬屋都得

最後嚟到車廂呢個環節，我個人覺得好有新鮮感，因為由細到大見到嘅Defender，佢哋嘅車廂陳設都係同車身一樣硬繃繃，力Sell硬朗感覺；但新一代版本就好唔同，至少中控台用咗好似Discovery3嘅設計，頂端嘅冷氣風口變咗做圓形設計外，上面各項設備嘅控制鍵，鋪排都清晰過以前好多，用起上嚟好Easy。
當然，佢嘅最大賣點都係尾斗，雖然佢係屬於車身較短嘅90版本，但勝在係單Cab雙座位設計，所以空間大得嚇人，長身或者數量較多嘅物件都擺得落，真係用嚟搬屋都無問題。