今季馬會准許馬主攜同未成年子女入馬場，但小孩子在場內絕不容許接觸或接近投注地方。左丁山親眼見到不少馬主帶仔女落沙圈，拉頭馬，一於等佢哋近距離接觸馬匹。例如馬主N位公子在名校聖XX男女讀書，落馬場沙圈已唔止一次。馬主N話：「橫掂個仔會步我後塵，到澳洲讀大學，不如趁早等佢知道香港馬場情況，費事佢喺雪梨入馬場好似大鄉里咁。」澳洲人跑馬，一家大細入場，司空見慣。去年左丁山到東京參觀安田紀念盃大賽，亦見到不少媽咪推住嬰兒車入場。我哋香港做乜鬼咁驚十八歲以下少年兒童入場呢？
馬會畀，馬主肯，其實關第三者乜事。哈，睇報紙先知道「博彩獎券委員會」決定召開公眾諮詢會員，然後決定是否終止、限制或保留馬會呢項准許馬主帶未成年仔女入馬場嘅政策。唉吔，香港好似患上「諮詢症候」，事無大小，都話要諮詢一番。呢個「博彩獎券委員會」真係冇事搵事做，驚死俾人話佢冇存在價值，又學人搞諮詢，怕且到時只會有泛道德派關注組去反對。左丁山特登在此寫出嚟，希望上屆香港馬主協會主席吳守基，今屆主席陳俊達諸公注意，唔該你哋密切留意，唔好一時唔留神，俾泛道德派偷雞代表所謂民意。
惡佬明好唔抵得啲泛道德派，上星期六帶剛年滿十八歲嘅姪仔與十九歲兒子入馬場，親自教兒子填飛，睇馬，買單T，態度甚為認真，好似在地盤監督落石屎咁款，當係子姪嘅通識教育。惡佬明姪仔話不久前學校作文，題目為「從明X社職員角度論賭波合法化」，姪仔諗完又諗，寫咗篇文贊成賭波合法化。得乜嘢分數呢？好精彩，就係B─F，姪仔問老師點解，老師話：「你嘅文筆唔錯，立論幾好，正路應該有B。但出到去公開試，唔知評卷員點樣睇，怕佢哋會話你誤讀題目噃。既然係從明X社職員角度立論，你應該反對賭波合法化嘅，你竟然贊成，或者會攞個F㗎。」姪仔真幽默，對左丁山講：「做明X社職員冇言論自由嘅咩！」