屯門李小姐推介工商銀行（1398），原因係內地面對嚴重雪災，已經令經濟損失538億元人民幣，抗雪救災行動隨即展開，而推行得如火如荼的宏觀調控，估計力度會暫時減弱。
李小姐：內地銀行或者可以增加番個貸款額，工行可以開大啲水喉，所以計劃買入工行。我打算喺4.5蚊低撈工行，見6蚊即走，實行短炒一轉，希望幾個星期就有得賺，止蝕價就定喺4.2元。
楊慧玲：工行係內地國有銀行嘅一哥，係六行中嘅龍頭股，到底李小姐有冇揀錯？
黃敏碩：工行喺六行之中的確屬於好股，李小姐冇揀錯，選擇都好正路，但要喺咁短時間內達標，就有啲難度。
楊慧玲：工行今日（昨日）個股價圖，仲有支大陽燭喎。
黃敏碩：𠵱個情況最近好少見，近期都係陰盛陽衰。內地宏調令大家好擔心工行收益，今年會冇咁靚仔；工行近期亦做多好多嘢，例如財務管理，可提升盈利、擴闊息差等。喺條件上，工行係值得短線吸納嘅股份，但喺𠵱家咁波動嘅市況下，股價會唔會受股市「地心吸力」影響，就要小心考慮，所以李小姐嘅入市價定得低過市價，都係啱嘅。
李小姐：如果想買佢嘅窩輪，策略應該點好？
張小喬：今次跌市，係中資金融股帶頭，窩輪縮引伸波幅嘅情況亦好常見，恒生指數同埋中移動（941）嘅場外期權都跌咗唔少，工行波動較大，資金又唔配合，所以唔建議𠵱家買入工行窩輪，都係買正股好啲。
黃敏碩：我會建議李小姐分注入市，第一注可考慮喺4.8蚊買入，見5蚊就先行獲利。
-李小姐建議-
建議買入價：$4.50 目標價：$6.00
止蝕價：$4.20 時間：短炒
新鴻基地產（016）
前景俏 超賣有得諗
李先生：美國減息，樓宇按揭息率咁低，我想推介新鴻基地產（016）。
楊慧玲：但係今日地產股逆市跌得好犀利喎，你仲諗住入？
李先生：佢跌咗咁多應該有啲超賣，加上佢有收租項目，喺廣州嗰邊又有投地。我睇155蚊會唔會好過份？
黃敏碩：短線有可能因為雪災因素，影響內地資金來港投資情況，不過睇番中長線，新地幾積極，除咗本地樓銷售情況，內地土儲又充足，可以期望第二季再減息等等呢啲利好因素，155蚊呢個水位可以考慮。
張小喬：要留意番恒指下調壓力大，有可能帶動地產股都受壓。
中石化（386）
短炒有錢賺就走
黃小姐：前幾日我喺8.7蚊入咗中石化（386），諗住短炒一個星期，睇佢會去到10蚊，你哋睇得唔得呀？
楊慧玲：你8.7蚊入咗，今日收8.76蚊，都有微利喎，黃敏碩、小喬你哋對呢隻石化股點睇？
黃敏碩：中石化今日反彈力唔錯，不過大陸唔畀成品油加價，股價可能仲未見底，最好做定防風措施。
楊慧玲：其實有冇call輪啱睇好中石化嘅投資者？
張小喬：如果炒中石化嘅窩輪最好等一等先，原因係今次調整完咗未都未知，𠵱家中石化正喺250天平均線度爭持，其實黃小姐可以考慮先喺10天線9.4蚊水平減吓磅，或者再重新檢討策略。
黃小姐：我都唔一定會等到10蚊先走，有錢賺，早啲走都唔奇。
黃敏碩：都啱嘅！高油價始終係佢蝕底因素。
-黃小姐個案-
買入價：$8.70 目標價：$10.00
止蝕價：─ 時間：一星期
中石化call輪（9255）
輸咗九成好心噏
溫小姐：我喺舊年11月買咗中石化call輪（9255），買嗰陣0.233蚊，跟住跌到好低，中間反彈過去0.19蚊我又唔識放咗佢，隻輪五月到期，𠵱家得番兩仙半，我都唔知點算！
張小喬：你應該考慮反彈即沽，因為中石化（386）正股跌，越嚟越價外，槓桿比率就變大，時間值損耗就越大。
楊慧玲：隻輪跌到剩番十分一咋喎，你都唔走？
溫小姐：我之前買呢隻賺過錢，咁咪再買番，點知反彈兩次都無走到。其實隻輪跌到去1仙，係咪就唔會再跌？
張小喬：係就係跌到1仙唔會再跌，不過如果隻輪嘅內在價值唔值1仙，其實發行商係出唔到價，𠵱類窩輪翻身機會唔大。
溫小姐：隻輪5月到期，咁我係咪應該等正股去到10蚊先沽晒佢？
黃敏碩：對上一個讀者都有問過，我都係提議宜短不宜長，中石化對油價波幅比較敏感。
-溫小姐個案-
買入價：$0.19 目標價：─
止蝕價：─ 時間：6月到期
中石油（857）
$20跌落嚟好吸引
陳小姐：我想買中石油（857）呀，佢由高位廿幾蚊跌落嚟之後，𠵱家真係幾吸引。
黃敏碩：因為中石油去到呢個水位算係吸引，加埋佢有四厘幾股息，舊年畢菲特都係大概呢個位獲利，不過想繼續上，就擔心可能有好多蟹貨。
陳小姐：𠵱家11.46蚊買唔買得過呢？
黃敏碩：其實都可以揀，不過我個人比較睇好中海油（883），因為中海油產能比較高，可以作為中長線考慮。
陳小姐：咁如果買中海油，又應該邊個位入呢？同埋應該點定個止賺同止蝕位呀？
黃敏碩：要留意返油股未必跟油價走，而且油股對經濟氣氛敏感度較高，可以考慮小注玩吓先，中海油可以睇返約11蚊邊位，上望12.8蚊水平；至於止蝕價，可以定喺9.9蚊至10蚊；另外，你亦都可以考慮埋今年比較當炒嘅基建股。
-陳小姐建議-
建議買入價：$11.460 目標價：─
止蝕價：─ 時間：三個月
建設銀行（939）
吼$5.4玩多轉
關公：哎呀！我前幾日推介過嘅財險（2328）、建設銀行（939）同埋中國國航（753），今日全部早走晒，隻財險前日7.46蚊入，今日最高見過8.2蚊，賺少咗！
黃敏碩：其實你短炒策略係啱喎，因為大家都唔係咁睇好你講嘅嗰幾隻股份，你係咁嘅市況仍然可以賺到錢，已經算唔錯。你今次打嚟，其實想推介乜嘢股份？
關 公：雖然今日走咗建行，但我都建議喺5.4蚊買番，5.9蚊沽售走番轉，𠵱隻股就算走唔甩，長揸都無妨。
黃敏額：雖然有大行downgrade中資銀行股嘅目標價，但個人嚟睇，中資銀行股仍然可以睇高一線。如果買窩輪博唔博得過？
張小喬：最好等正股跌定，正股波幅落番嚟，到時先買番call輪就會值博啲。
黃敏碩：市場始終認為中資金融股唔係今年黑馬，𠵱類股份未必夠基建、電訊股咁當炒。
-關公建議-
建議買入價：$5.40 目標價：$6.00
止蝕價：$5.00 時間：長期
滙豐控股（005）
夠實力唔怕長揸
黃小姐：舊年12月喺140蚊買咗滙豐，打算長揸。
楊慧玲：滙豐之前受次按影響，大家都睇淡佢，點解你仲買滙豐？
黃小姐：夠實力嘛！
黃敏碩：秤估值，滙豐可以講話越嚟越合理，甚至可以話係吸引，但始終未知次按個黑洞有幾大，同埋佢會唔會步花旗後塵削減股息，引發中長線投資者沽售。
楊慧玲：滙豐嘅窩輪策略又點睇呢？
張小喬：以前買滙豐call輪情況較多，不過近排情況較特別，高低波幅由105至120蚊，所以𠵱家建議大家可以用call、put兩手準備炒波幅，可以先考慮喺正股120至122蚊買put輪，博4至6蚊正股波幅。
楊慧玲：銀行股入面係咪渣打（2888）會好啲呢？
黃敏碩：渣打受次按影響較少，而且亞洲市場業務開始有貢獻，兩者之中確實以渣打較為可取。
-黃小姐個案-
買入價：$140.00 目標價：─
止蝕價：─ 時間：長期
中遠call輪（3926）
仲有水位
David：波羅的海指數升番，中國遠洋控股（1919）再升8%，農曆新年前應該仲有得炒，所以推介一隻中遠call輪，估計嚟緊幾日會見0.15蚊，各位專家點睇？
黃敏碩：航運股係周期性，之前超賣咗，近日趁好消息反彈，不過要留意中國遠洋都幾多蟹貨，可能只係短期反彈，春節後資金又可能轉移去炒第二類股份。
楊慧玲：黃敏碩講完正股前景，小喬你對於隻call輪點睇？
張小喬：𠵱隻輪今年7月到期，槓桿比率3.6倍，要留意嘅係，正股現價較隻輪嘅行使價有成47%折讓，咁價外嘅輪，時間值損耗好大，一個月有成20%嘅時間值損耗，買𠵱類窩輪風險較大，David如果睇好中遠走勢，揸正股仲着數。
-David建議-
建議買入價：$0.119 目標價：$0.15
止蝕價：$0.11 時間：一星期
互動日誌：放完假再入市
港股昨日挾着美股餘威高開，萬料不到內地股市前日跌穿牛熊線後，仍流血未止，昨早段跌逾百點，拖累港股腳軟倒跌。當大家以為大市重演「單日轉向」，港股負隅頑抗，上午已扭轉劣勢，午後升幅更進一步擴大，散戶終可一展歡顏，更蠢蠢欲動想出擊買貨。
事實上，今日的升市未見全面，大藍籌中，本港地產股斯人獨憔悴，竟不及內房股或航運股搶鏡，均叫人意外。joiner查詢推介的，多是沉寂多時、毫無起色的中資股，昨日一個大反彈，已紛紛成為散戶的頭號獵物。然而，中資股在沒有重要利好消息公佈下回勇，不免讓人擔憂是「迴光返照」式的技術反彈，而非真正的「撥開雲霧見青天」。
尤記得兩星期前的周五（1月18日），港股又是V形反彈，股民滿心歡喜之際，殊不知接着的周一及周二，大市便一瀉千里，兩日急跌逾三千點，為港股加添一項「輝煌」紀錄。
不是我保守，春節長假前還餘下兩日半市，觀望氣氛漸濃，加上外圍股市無休，次按陰霾未散，多項經濟數據陸續出籠，都是股民需要留意的。大家倒不如身心也來放個長假，待市場稍見方向，再入市未遲，記着，財不入急門呀！
