謝安琪同老公張繼聰、張詠恩、Oscar同DJ細蘇，早前每人夾五位數字資金，今年喺維園投咗個年宵攤檔，仲改名JepJep，主力賣月曆，大約發售500個，每個賣40蚊，不過顧客可以畀多啲錢當做善事，收入全數捐畀慈善機構匡智會，而佢哋幾個噚日就喺檔口好落力叫賣，都有唔少歌迷嚟捧場。
張敬軒捐錢
Oscar話前晚已開始搭攤檔，佢話：「我哋搞到噚晚半夜先完成，啲月曆今日下午三點幾先送嚟。呢幾日我哋會輪流睇檔，年三十晚大家做完嘢都會落嚟幫手。」除咗月曆，佢哋仲會擺賣朋友設計嘅T恤，大人嘅賣138蚊，小朋友嘅賣98蚊，至於大人帽就賣168蚊，童裝帽就賣128蚊，但呢啲收入就唔會捐作慈善用途。
張繼聰搞呢次義賣，佢話：「好想話畀後生仔知道，做善事都好潮，軒仔（張敬軒）、方大同、王菀之同EO2都有捐錢，佢哋話得閒都嚟幫手。我哋希望將JepJep申請為非牟利團體做善事，歡迎啲藝人參加。」
問張繼聰點解唔搵囝囝做model？佢話：「呢次月曆個model得意啲，或者囝囝下一次啦。」