康華、郭晉安同郭羨妮早排接拍內地古裝劇《八仙全傳》，即將喺今年榮升鼠爸爸嘅安仔，趁老婆歐倩怡待產，狂拍劇𢱑銀儲奶粉錢，希望畀囝囝同家人過舒適生活。
亞視邀加盟
安仔喺劇中扮演擅長吹簫嘅才子韓湘子，康華就扮何仙姑，佢哋係青梅竹馬嘅好友，仲有一段清純嘅戀情㖭，後來何仙姑得道成仙，選擇放棄兒女私情，令韓湘子好失望。其中有幕佢哋喺船上相會，由於艘船猛咁搖，何仙姑企唔穩跌倒，差啲咀到韓湘子，好彩何仙姑眼明手快用手阻隔，避免咗嘴對嘴。
康華同安仔合作過好多次，所以拍呢場戲時一啲都唔尷尬，只係天氣太凍，搞到佢哋騰騰震。康華讚即將為人父嘅安仔成熟咗唔少，佢話：「我呢次同安仔合作，發覺佢人生觀唔同晒，可能就嚟做爸爸，性格冇以前咁執着，變得好有遠見。」原來康華同無綫上年中已經約滿，亞視對佢好有興趣，康華話：「亞視有搵過我，不過仲傾緊，未有新進展，我會考慮吓。」
