香港最近天氣轉冷，以香港標準嚟計，好耐未試過咁凍咯。星期四中午未出街食飯之前，上天文台網站睇吓中環溫度先，香港公園有9.5度，昂坪最冷；得二點八度，赤柱最暖有十點一度，唔怪得有錢佬要住在南區，果然係冬暖夏涼。
香港人暖慣，本來已經雪雪呼凍，但睇電視見到內地十七省市有雨雪之災，溫總理冒嚴寒天氣上路，奔赴災區前線，喺北京上咗飛機都未知可以在邊個機場降落，總之係要有飛機坐飛機，有火車坐火車，冇火車就坐汽車上路，呢副拼勁，係得人民尊敬嘅。但令人大惑不解者，就係廣東省委書記汪洋與省長黃華華究竟平時做乜，要等到總理嚟先至識得開放會展中心安置候車（火車）民工，等佢哋有瓦遮頭？如果溫總理仍然留在京城，汪黃兩位是否仍然做事「枉枉」？
睇見內地八千萬人民受災，左丁山唔敢嗌凍。香港係好幸福㗎嘞，冇雪、冇大雨，電力供應充足，交通雖然擠塞但安全無事，唔似得湖南、貴州咁悽慘。況且我哋呢幾日嘅八卦話題係甚麼網上淫照，不理國家大事，懶理講江南冰封，最多係關心股市亦遭遇雪災啫。「網上淫照」做乜搞到咁大件事，幾乎日日上報紙頭版、二版？嚡，《時代》週刊好抬舉香港，創製新字Ny-lon-kong（紐倫港）將香港與紐約、倫敦相比，慚愧、慚愧。人哋紐約倫敦講金融、文化、藝術、音樂，香港就只係講金融與明星八卦，有甚麼樣的市民，就有甚麼樣的報紙。一位公關要人問一位報紙老總：「網上明星淫照，使唔使做到咁大呀，對小孩子以至社會風氣都唔好啫？」老總嚡一聲。嘆一句咁回答：「最初我哋都想downplay一啲嘅，唔想以大篇幅報道不良風氣，但唔做嗰日就報紙滯銷，敵報暢銷，我見勢色唔對，唯有照樣大做，咁先至與對手銷量扯平，嗱，呢樣就係市場導向，讀者教我哋點樣做新聞，我哋有甚麼不同想法，暫時都要放低，否則銷量即時下跌。」冇得好講咯，社會風氣如此，講淫照，大把人興高采烈，講雪災，個個話悶喎。