前廉政專員羅范椒芬舊年被迫走出廚房觸發多位高官調動，AO袁銘輝執到好籌，上位做海關關長成為部門一哥。袁銘輝為官27年十分低調，曾任前特首老董私人秘書，一般人唔知佢有乜建樹。早前接受海關內部刊物訪問終於打破緘默。佢話做官生涯最難忘經歷，係83年做元朗助理民政事務專員時，要處理清拆天水圍木屋，居民不滿向佢掟雞蛋同番茄洩憤。
俾人掟吓番茄就無憂無慮到公卿，佢都算好彩。袁銘輝自言愛聽古典音樂，近年迷上打高爾夫球，覺得打高球好似人生，「打高爾夫球有18個洞，今局完了，又有下一局，但人只有一生，所以要把握每個機會，令這生命活得豐盛、無悔。」袁銘輝係文官，統領紀律部隊對下屬有特別要求，建議下屬多睇《紅樓夢》、《三國演義》、《西遊記》同《水滸傳》等經典，打好中文基礎。