【上海直擊】袁詠儀前晚在上海出席手袋活動，收爐前袋厚酬的她，不介意穿KateMoss舊衫。活動在LisaS.、吳彥祖等投資1,200萬的新酒吧舉行，佔主場之利的Lisa穿比堅尼行騷，並表示該酒吧是與男友的退休計劃。
袁詠儀（靚靚）新劇《移情別戀》日前煞科後，即趕赴上海出席Longchamp手袋活動，實行搵真銀過肥年。靚靚獲大會安排穿上名模姬蒂摩絲（KateMoss）穿過拍廣告的紫色皮褸，靚靚着起來顯得有點大，她說：「我一向唔係好鍾意紫色，不過件衫着過幾舒服。」
下一站北京開店
活動在LisaS.與男友吳彥祖（Daniel）等開設的RacksBilliardsClub，佔了主場之利的她一樣有行手袋騷，但其他女模要穿比堅尼，她就有大披肩包着，LisaS.透露六個人投資1,200萬港元，她說：「這間店是第二間，比香港的大五倍，這個是我的退休計劃，今次Daniel也有份，與我一齊做股東。」她表示下一站將在北京開店。
代兒子投資股票
靚靚直認今次酬勞豐厚，所以不惜抵冷到上海，她說：「酬勞好好，又送袋畀我，做埋都收爐喇，我會休息幾個月，休養好身體同養好聲先，賺錢呢啲留畀老公搞。」問她養身可是準備再生？她說：「會生，不過唔係𠵱家，等小魔怪升幼稚園先再諗。」新年將至，靚靚每年至少派五位數利是，又謂會為囝囝儲起利是錢升學，她說；「舊年我幫佢拎利是錢買股票，買咗港交所，當時幾十蚊，𠵱家過百，如果佢將來讀唔到書，我唔會留畀佢做二世祖，我同老公拎去遊埠使。」
採訪、攝影：曾小嘉
