解放後的甘國亮，變了千面郎君，一時是安地華荷，依稀昨日，還在衣香鬢影的型人派對中……
今天又已然變身大建築師路易簡，唱起浮華亂世宿命緣的「首本甘曲」《微妙的安排》。記者登門他幾乎來者不拒，差點就任人魚肉。雖自言最愛孤獨，但要麼唔搞，一搞就大鑊，就如今次一鑊炒起的粒粒巨星，20大入選「佳麗」，他交心交到「食髓知味」，一台「大龍鳳班霸的飯局」一問一答間，私隱、情史，有多憤世嫉俗，就有多浪漫。
記者：馮敏兒
攝影：伍慶泉
神交．自殘．佳麗
甘國亮新書《我問人：人問我》中，他向江湖朋友下了一道英雄帖，邀請大家給他提一個問題，讓他借題發揮。年前他就成功獵獲60個「山水有相逢」的提問。「有些二話不說，爽快得很，有些富於幽默，但大部份都冇，有些悶蛋，亦有些太嚴肅，如蔡明亮、章子怡、李安，最後都問唔出。其實大部份人都以為要佢抬舉你，睬你都儍，尤其年輕一輩，就似怕你會做甚麼的。世界唔同喇，甚麼都有程序關卡，還是老一輩像張藝謀、梁家輝，他們就知道這是NoBigDeal，玩玩開心而已，你睇佢哋問題就知佢係乜嘢人。」說過「退休，NoWay！」的甘國亮，為公為私，把最後入圍的20位「佳麗」再來個精工雕琢，3聲道，繁體、簡體，中文、英語並存，邁克、林在山、岸西、胡恩威等仗義出手繙譯，還有非常回味的美學支撐。「撩者先賤，我們這個行業最容易有『神交』感覺！」就這一來一回，果然非常過癮，盡得風流！
此恨綿綿找死去
「落選佳麗」邁克其實問過老甘：「擺圍酒要你請12個中外女星同枱食飯，邊個會收到請柬？點安排座位？」老甘答曰：「頑皮的邁克先生，模擬一枱大龍鳳飯局，認真找死，名單一出，得罪人多稱呼人少，本來已受不起考驗的友誼，乘機瓦解，此恨綿綿。」哈！邁克一矢中的，途人便紛紛下馬。繼去年邁克將法文金曲《Lesmoulinsdemoncoeur》改編成《微妙的安排》畀老甘大賣風情，今次又同佢繙譯答張震問，過程中還抽出一件已故大導演楊德昌的寃情，原來《牯嶺街少年殺人事件》的英文名《ABrighterSummerDay》被好些大鼻的歐陸人士夾硬改了做《ABrightSummerDay》，但楊德昌一直冇就範過，再翻聽FrankSinatra當年所唱也確是ABrighterSummerDay！「你可以水皮，但佢哋唔可以失禮！」
三文三語 六親不認
點解搞到咁大陣仗，三文三語統統出齊？原來老甘要大發雷霆：「我哋明明好哋哋識英文，點解𠵱家覺得佢有毒？簡體字也是禍害，但竟然有人再話要廢繁體！以為繁體字不外是繡花，點解連自己嘅孖生兄弟都驚佢死得唔夠快？」世態炎凉，老餅總係睇唔過眼，絕不死守這座「墮落之城」：「香港以前可以做嘅嘢實在太多，你唔做就唔好抵賴，但𠵱家低於水平嘅事實在太多，參與便等於自己製造一個惡果！」
我要向成龍贖罪
王家衞問老甘：「在你記憶中，我們兩人可有試過一起買票進場看電影？」鏡頭一飛就到了台北1991，那時王剛拍完《阿飛正傳》，不但電影，還有大明星露點艷舞，同夜加插一場貨真價實雙雙目睹的街頭謀殺案，比電影更電影！只是那邊老甘報答成龍一問，即編即導《龍顏大檢閱》成龍大戰虛擬李小龍。點知埋門失腳，Jackie錯印成Jacky，龍顏不悅唔收貨，老甘為贖罪，從書倉狂找書號0407（成龍生日），經人工改造，給他特製一本「虛擬正版」取悅龍顏。
絕頂高清廢話
訪問問來問去一個唔覺意提到高清，竟換來老甘發火：「香港人咁容易被愚弄，已去到絕頂境界！阿姐皺紋兩條變四條？冇一樣嘢值得用高清睇。不但冇人要求業者，業者亦唔打算做啲乜，一劇兩播就算做咗嘢？日本有咗高清8年都未搞得掂，佢哋發明咗一種肉眼不能衡量嘅特殊化妝，現場可能嚇死你，但燈光一照攝入高清靚到飛起。」但相反就好似當年「黑色的劉青雲對發光的潘迎紫！」老甘最後問讀者：「唔係買咗機頂盒就得，請問你知唔知你做緊乜？」做訪問都算最高清囉呢次！
10月懷胎只為好玩過癮
「每個朋友第一句都係讚咗先！」甘國亮的確所託「真人」，他就是那個坐在老甘旁偷笑的神秘嘉賓陳輝雄。他的「模擬城市」曾設計過3百多張唱片封套，如楊千嬅、黃耀明、張敬軒等，又是「進念」宣傳美學一分子，亦曾編導舞台劇。記者抽他來示眾，他吐真言說足足做了10個月：「以為靚就可收貨，但甘生啲文越睇越有味，玩玩吓又幾好玩，點知越做越多嘢，結果從去年3月搞到現在！唔關靚、顏色、字款事，係點樣做到最佳引導而非加深誤解。」睇嚟甘生出的難題才真正玩死街坊，一句過癮難求，個個前仆後繼！
