踏入2月，港股似乎有個好開始，承接華爾街股市周四晚勁升，港股昨日高開逾300點，走勢「正路」，但隨後大市卻由升轉跌，既然咁都得，梗係有淡友見勢追沽，一輪飛沙劈石，恒指下試23300點水平，再次跌破250日線；不過「空軍」只開心得一陣，股海「雷霆救兵」殺到，展開大挾倉行動……
淡友鎩羽而歸，港股獲中資金融股帶動，收復250日線之餘，更成功重上24000關，升667點或2.8%，成交都算不俗，有1194億元。惟散戶如有留意，大市升勢集中在國企股，市傳內地宏調或因雪災而有放鬆可能。
憧憬宏調或因雪災影響而放鬆，思路雖合情合理，但恕星俠「愚昧」，宏調主要任務是要抑壓通脹及物價失控，然而雪災幾乎覆蓋全國，運輸大受影響之下，不少省分地區物價已因而飆升，換言之，通脹數字難以在短期回落。若然如此，中央又怎會隨便改弦易轍？
候18元附近買貨
今次雪災暴露全國「硬件」仍有很大不足之處，加強鐵路、公路網絡必成日後重點政策之一，候低吸納中交建（1800）作中線投資應具一定贏面，該股重要支持位在18元；昨日受大市挾倉而急升，建議候回吐近18元買貨，以16元止蝕。