繼梁奕倫後，香港電台另一皇牌DJ、長壽節目《瘋Show快活人》主持梁繼璋亦於上周悄然告別。80年代，梁繼璋與林姍姍、鄭丹瑞等明星DJ一起走過港台光輝歲月，但從前熱熱鬧鬧的大家庭，今日卻陷入是非困局，在梁繼璋眼中已變得冷冷清清。這次離別，梁繼璋說沒有太多的傷感，畢竟，天下無不散之筵席，自己大半青春都花在港台身上，很想到外面的世界走走，給自己一個悠長假期，告別《瘋Show》，做個真正的快活人。
撰文：戴彩煥
隨着多位幕前幕後捲入貪污事件、朱培慶與艷女CoCo夜遊引起的桃色新聞，以至近日張文新醉駕，港台近期陷入前所未有的低潮，就在港台五勞七傷之際，當紅DJ卻一個個離開，頓令港台變得星光黯淡。
這個時候選擇離開，又是否適合？
梁繼璋日前在其沙田寓所接受訪問時說：「我又唔會睇呢啲嘢，好難話幾時適合，係咪遲啲港台就冇咁多風雨？冇人知。人好難預測將來，只係覺得自己乜嘢時候做啲乜嘢最適合，咁咪去做囉，外來因素控制唔到，可能等所有嘢明朗晒時，我已經老，已經過咗50歲㗎啦。」
天下無不散之筵席，縱使是世上最長壽、最受歡迎的一個節目，也有終結的時候，這是梁繼璋離開在即的感覺。
悠長假期 移民探路
梁繼璋03年接受了港台公務員自願退休計劃後，再次受聘港台繼續主持節目《瘋Show快活人》，上周他離職的消息傳出，立即惹來諸般揣測，說港台因受壓而不再跟梁繼璋續約，但他卻說是自己向港台請辭：「做咗咁耐DJ，自己固然好enjoy，但都想做啲未做過嘅嘢；前兩年同人夾份開學校（兒童天才培訓），因為投放時間唔夠做得唔好，所以做咗年半就退股，但我唔死心，我好想再開番間，到時我會全身投入。第二，係我兩個小朋友都有鼻敏感，唔知係咪香港空氣混濁，去另一個環境對佢哋會好啲，所以今年5月我會成家人一齊去加拿大，視察吓環境係咪適合移民。第三，係自己好想放一個悠長假期，03年退休之後我以自由身做節目，又寫稿又教書，一個星期返足7日，仲忙過以前。」
79年梁繼璋仍是浸會大學學生時，便以實習生身份到港台做DJ，畢業後他正式投身港台為當時主持《太平山下漫步》的朱培慶任節目助理，雖然期間幾度離開轉投佳視及唱片公司，但轉轉折折，大半青春都花在港台。
在港台長大，一分一秒也是回憶。
梁繼璋說：「好記得有次參加《青春交響曲》聚會，要做個人表演，自己想扮型仔，於是着套軍服，戴住飛虎隊面罩，揸住支長槍唱太極一首快歌，點知嚇到個小朋友喊，真係好尷尬好瘀，唔知點收科。又有一次做通宵節目，因為太攰瞓着咗，以前係播黑膠碟，結果首歌播完都唔知，後來返朝早6點嗰位主持返嚟拍醒我，嗰個就係韋家晴，即係今日嘅陳志雲。阿旦（鄭丹瑞）話畀我知，佢做通宵節目時，都試過突然間便急，於是播關正傑嘅演唱會，有成45分鐘，諗住一定冇死啦，點知佢去洗手間一除褲，就聽到隻碟跳線，惟有即刻着番條褲衝入直播室。」
港台為家 回憶珍貴
一個人做通宵節目，有時還會遇上一些恐怖經歷。梁繼璋笑說：「有次深宵時分返港台做節目，一打開直播室道門，見到一個古裝人企喺面前，以為自己撞鬼，睇真啲，原來係洪朝豐，嗰陣時TVB喺廣播道，洪朝豐喺TVB拍劇，又唔落妝，嚇到我死死吓。」
開心瑣碎往事，講足一個禮拜也講不完，港台對梁繼璋而言是一個很溫暖很親切的家，本來早年曾有電台找他過檔，但梁繼璋始終覺得港台有人情味，所以最後選擇留低，縱使港台後來面對一浪又一浪的是非風雨，他也不曾後悔當年決定。
不過，近年港台變得面目全非，令他倍覺冷冷清清，梁繼璋說：「𠵱家同事間好似沉默好多，謹慎到冇乜空間，港台未來命運又未明朗，你覺得個氣氛會唔會好？當然，作為一個員工，點都要盡量做好本份，海面風平浪靜嘅時候咪享受吓，風大浪大時咪忍受吓囉，有啲嘢唔發生都發生咗。」
承認舊情愧對淑梅
港台DJ牽涉貪污，梁繼璋不予置評，談朱培慶，梁繼璋說對方已付出代價：「喺港台，有兩個上司我一直好敬懼，佢哋做嘢好叻，但唔笑個樣好惡；一個係吳錫輝，一個係朱培慶，朱Sir係幾認真同嚴肅嘅人，唔會點同我哋講笑，所以發生嗰件事，我都幾震驚，嗰件事已經成為歷史，佢都付出佢應付嘅代價。」張文新醉駕，梁繼璋認為只是「意外」一宗，沒有甚麼好評論，只說：「新哥為人比較隨和、容易溝通，只係開會特別多嘢講。」談到當年他曾跟張文新太太車淑梅拍拖，一直死口不認的梁繼璋終承認說：「我哋好耐以前係一齊，係自己當年唔識得好好珍惜，佢（車淑梅）𠵱家位先生好過我100倍，見佢有個幸福家庭，我都戥佢開心。」
-一次被貶終生努力-
80年代，香港電台有林姍姍、何嘉麗、鄭丹瑞、蔡楓華、黃凱芹、周慧敏、區瑞強、鄧靄霖、鄧慧詩、夏妙然、倪秉郎及車淑梅等DJ，粒粒皆星，作為前輩，對新一代DJ又有何評價？梁繼璋說：「𠵱家DJ太容易得到（機會），以前電台太多叻人，個個都係明星，想攞個好嘅airtime做節目真係難過登天，就算車淑梅最初只係一星期做10分鐘《車天車地》，好多人要默默咁等機會，所以得到後會特別珍惜。」
「唔好衰畀人睇」
梁繼璋續說：「好記得有次開會，有位高層話：『大家唔好以為收到幾封fans信就覺得自己節目好多人聽，做節目邊個冇fans，梁繼璋都有fans啦！』其他DJ聽到卡卡笑，可見得喺佢哋當中我係幾咁渺小，呢句說話我一世都記得，我同自己講，一定要做好啲，唔好衰畀人睇。」
結果，本來一句令人氣餒的說話變成梁繼璋的原動力，節目越做越受歡迎，包括早年與倪震和邵國華主持的《三個寂寞的心》及做足10多年的《瘋Show快活人》等，他又多次成為十大最受歡迎DJ，總算爭番啖氣。
「港台頒獎禮公正」
近年電台或電視台音樂頒獎禮備受批評，原本為鼓勵歌手及音樂人的頒獎禮變成討價還價交易，出現分獎唔勻玩杯葛的現象。對此梁繼璋說：「我覺得有人鬧都叫做有反應，起碼大家會留意，好過選啲乜姐物姐！不過，拗咗咁多年，係咪一個可以代表晒呢？搞得太多有膩嘅感覺，個個頒獎禮準則唔同，順得哥情失嫂意，但我覺得港台喺冇乜商業利益衝突以下，一路以嚟都可以取得平衡，喺咁多個頒獎禮嚟講比較公正。」
