後日就年廿八，又要洗嘢，又要執雜物，再加埋個油𣲷𣲷嘅廚房，如果唔早啲開波清洗，幾日都未必執得間屋亁淨。唔想浪費時間研究點去迹，就要熟讀HomeCLEAN家務助理慧姐，同香港專業進修學校嘅關Sir，聯手提供以下家居清潔速成班精讀篇，去除家居難纏污迹。
記者︰劉昱蘭
攝影︰周旭文、陳陶鈞、梁細權
Model︰Ruby、Kathy
洗浴室大法
關Sir喺港專執教家務助理有9年多，亦有教授酒店Housekeeping課程，所以浴室點樣可以洗到整整齊齊一塵不染，佢肯定係專家。原來喺浴室，只要1支漂白水就可以打天下，真係乜錢都慳番。
CheckPoint1 漂白水浸馬桶
浴室經常濕漉漉，特別多水迹，日積月累變得又黃又啡，好似馬桶內坑位咁，直身鮑魚刷未必刷得到，可倒一瓶蓋漂白水入馬桶內，浸3-4小時就乜都白番晒。至於水箱位，關水掣後，用百潔布加稀釋漂白水向下捽，既消毒又殺菌。
CheckPoint2 清潔劑防鏡面水氣
鏡面成日都會有好多毛頭，多水氣又好易會霧化，原來市面有一隻叫玻璃清潔劑，可以令鏡面不易因水氣而霧化。先把1:20的清潔劑抹鏡面，然後盡快過水，避免起化學作用，待亁後抹上玻璃清潔劑，最後用纖維布抹去毛頭。
CheckPoint3 浴簾浸水去迹
浴簾最易有水迹，平時可用1:20清潔劑，再用兩塊布夾住浴簾抹亁，就可以耐用啲。如果已經有霉菌，就要先用1:49漂白水浸浴簾約40分鐘，再用水清洗。然後用少量砂粉刷去油脂，清洗後便亁淨晒。
CheckPoint4 洗銅水洗水龍頭
好簡單，用洗銅水刷一刷就得，但唔好用百潔布或粗毛巾，好易刮花水龍頭表面，最好用海綿或全棉軟布。
港專大掃除特工隊（即日至2月6日）
收費︰每位員工$90/小時，每次服務4小時或以上。400呎以上面積建議要2-3位員工同時服務。查詢︰31946296
廚房客廳去污秘訣
做咗兩年多HomeCLEAN嘅慧姐，最鍾意成日周圍收風，睇吓有乜好橋搞掂間屋，唔怕打爛沙盆問到篤，所以咁難搞嘅廚房佢都冇有怕，仲有好多簡單平價tips入你袋。
CheckPoint5 牙膏去雪櫃門迹
雪櫃最易有異味，加上雪櫃門通常都會貼滿卡通公仔磁石，好易搞到有氧化痕迹，可唧少少牙膏於毛巾上，沾濕少少水，刷約半分鐘就清得一亁二淨。除檸檬外，清水加白醋抹雪櫃內櫳亦可辟味，而且能去迹兼殺菌除臭。
CheckPoint6 漂白消毒水洗機
洗衣機濕漉漉，係一個好易滋生霉菌嘅地方，只要加啲未稀釋嘅消毒液體或漂白水，空機洗一次就OK，記得經常打開洗衣機蓋，以保持亁爽狀態。
CheckPoint7 海棠粉抹獎牌
估唔到用以前啲女人搽面用嘅海棠粉，一刷上銀器就立刻令晒，慧姐話原來金X來呢個本地老字號，都係咁樣省皮帶扣㗎。
CheckPoint8：清水拖地
木地板通常打咗層蠟喺面層，所以千萬不可用藍威寶等清潔劑，齋用清水抹就OK，而且一定要用九成亁嘅布抹，否則越抹越黑。
唔想自己郁手洗屋，大可call幫手，咁年尾就可以慳番啲時間辦年貨啦！
HomeCLEAN歲晚大掃除計劃（即日至2月6日）
收費︰每位員工$90/小時，每次服務4小時。
查詢︰28382554