網上世界越來越無法無天，貌似陳冠希的淫照風波還未停息，崔建邦又自稱遭人在網上整蠱，有人冒充他在互聯網上交友及騙財，崔建邦認為事態嚴重，打算報警備案。
崔建邦前晚到將軍澳電視城錄影《勁歌金曲》，他透露日前收到朋友電話通知，有人用他工作時的照片在Facebook開戶交友，他說：「等啲人add咗我後，就話我買好多基金做善事，冧人買呃錢囉，因為呢啲算刑事，我會報警備案。」問到可有被人冒充身份向人示愛，崔建邦說：「好難講喎，有都幫佢唔到。」
阿B心亂甩嘴
另方面，鍾鎮濤（阿B）大前日處理好父親身後事，前日便投入工作，他前晚與林一峰、伍佰及Hotcha等演出《勁歌》，阿B一身黑衣素服亮相，在台上很少有笑容，看來心情仍相當沉重，他獻唱新歌《集體鼓舞》時，忽然甩嘴，於是示意樂隊停音樂，阿B問現場觀眾：「好唔好聽呢？想唔想再聽多次？我心情有啲緊張呀。」導演遂讓他重錄，但要由之前HotCha及EO2跳舞環節開始重錄。
事後阿B接受訪問，談到是否仍為亡父傷心，他說：「我心情有啲亂，其實工作先可令我唔得閒諗啲傷心嘢。」有指他埋首工作已算堅強，他說：「我都推咗一、兩單新年嘢，費事影響人，農曆新年我仲要去美加登台同日本綵排，我一定要堅強，我爸爸份人好堅強同熱愛生命。」
「坐喺度仲難頂」
問到阿B身邊人會否因此更擔心他，他說：「都係㗎，有時夾硬講笑令大家輕鬆啲囉，其實我OK，工作就得，坐喺度仲難頂。」現在是否更懂珍惜？阿B說：「我爸爸都笑喪，我最想佢睇我3月演唱會，破產完結後企上台，為咗我哋爭一口氣嘛。」至於HotCha前晚憑《PartyGirl》得冠軍歌，成員Regen表示之前得冠軍歌時在台上感謝無綫頒獎給她們，因此被朋友取笑了很久，今次不敢亂說話。
採訪：馬建華 攝影：陳俊強
