1月31日過去，意味今季轉會市場再度關閉；英超市場出奇地淡靜，曼聯、阿仙奴及利物浦均未有大動作，但其餘球隊在市場關閉前又突然活躍起來；當中又有幾多交易物超所值，又有幾多球員轉會是正確呢？
文：牽牛
最無辜：廸科爾（樸茨茅夫）
廸科爾踢了熱刺接近4年，1月轉會窗關閉前終離開倫敦，南下樸茨茅夫，只因唔想再蹉跎歲月，白支人工；不過馬華路禾尼加盟曼城臨門「撻Q」，巴路士外借加盟，烏達卡、簡奴又就快踢完非國盃，廸科爾隨時無辜辜變番後備兵。
最人球：文路祖（曼聯）
安哥拉前鋒文路祖1月1日從當地球會柏特路體育會加盟曼聯，出戰非國盃分組賽3戰入3球，心諗就算冇正選，都有機會踢曼聯預備組；點知轉會窗最後一日，曼聯將文路祖外借去希臘球隊彭拿典奈高斯，文路祖隨時連奧脫福都未去過。
最唔值：艾方素（米杜士堡）
艾方素以上季荷甲神射手，加上巴西腳之名，以1,300萬鎊加盟米杜士堡，米堡fans理應充滿期待；不過近季荷甲神射手，自雲尼斯達萊之後，基斯文、古積特登陸英超都冇貨交，巴西前鋒踢英超又冇好表現，米堡隨時買貴貨。
最貴價：安歷卡（車路士）
1月轉會市場交投淡靜，安歷卡如願以償，以1,500萬鎊從保頓加盟車路士，已經是英超最高價收購；安歷卡亦累積近9,000萬鎊轉會費，成為世界上累積轉會費最高球員，而且英超4大球會中，他踢過阿仙奴、利物浦及車路士，認真威威。
最𢱑頭：列馬倫（富咸）
領隊鶴臣可能已經將富咸「死馬當活馬醫」，1月轉會市場簽入芬蘭老將列馬倫救亡；無錯，列馬倫當年打阿積士同巴塞隆拿曉飛，不過過檔利物浦已經冇貨賣，近年連踢瑞典超馬模都唔掂，36歲人，受傷多過食飯，對富咸有甚麼幫助呢？