年宵市場噚日開鑼，政黨政團例牌喺維園擺檔爭取曝光。支聯會華叔喺維園幫市民寫揮春已成傳統，今年都唔例外，華叔即席揮毫，八方請華叔寫張揮春畀《蘋果》讀者拜個早年，華叔大筆一揮寫咗四個字，唔係「恭喜發財」咁行貨，係一句「根植伊甸」。
華叔解畫，指蘋果象徵智慧之果，如果亞當夏娃當年冇食到呢個「禁果」，就唔能夠體驗到人生真正意義，亦唔識分辨是非，「咁樣做人就真係毫無意義！」佢希望《蘋果》讀者日日都睇吓「智慧之果」，明辨是非。
叫《成報》「快快出糧」
華叔亦有幫其他報館行家寫揮春，一樣冇交行貨，而且字字珠璣一針見血，贈畀《成報》嘅揮春有兩句，係「快快出糧，成人之美」。八方同一班行家睇到即時拍爛手掌。至於寫畀《明報》嘅就文雅啲，「明月何皎皎，報之英瓊瑤」，有行家請華叔解釋吓意思，佢笑笑口講，因為覺得《明報》𠵱家有啲烏雲遮蔽，所以送呢兩張揮春希望《明報》新一年重見日月。呢個時候有段小插曲，企喺旁邊嘅長毛忽然搭訕，話要求華叔寫張「表裏如一」，點解呢？八方冇考究。
喺維園開檔前，華叔上個月起已巡迴各區幫市民寫揮春，佢話多得律政司司長黃仁龍義務擔任支聯會「籌款之星」，因為得佢起訴，令好多市民爭相搵華叔寫揮春兼捐錢畀支聯會，至今捐款累積逾16萬元，多過舊年，可能係近年新高，佢話有個88歲老婆婆最豪氣，即場捐出一大筆錢，印象中係支聯會有紀錄以來最大筆街頭捐款，金額多少佢不允透露，不過佢強調，寫揮春唔係為錢而係宣揚民主訊息，唔捐錢佢都寫，市民可以去1、2號檔位搵佢。
寫揮春受市民歡迎，公民黨由黨魁余大狀上陣，佢人氣盛，吸引幾多人喺16號檔排隊，帶好該黨精品都賣得吓；葉劉個匯賢智庫今年第一次喺維園年宵開檔，八方見檔位佈置簡單，同隔籬31號自由黨揼本裝飾檔位比較，匯賢真係相形見絀。
葉劉唔驚自由黨搶客
不過葉劉話唔怕被搶風頭，因為自由黨賣鼠年精品，佢則主打朱義盛首飾、寫揮春同拍賣三個自己用過嘅手袋同一條舊絲巾，大家客路唔同。葉劉幾件二手用品聽日中午拍賣，底價幾百蚊起，拍賣同攤檔賣物收入全數捐畀單親協會，有興趣可以去32號匯賢攤檔睇吓。