星期六中午，步入沙田馬會會所凱旋廳飲茶，即刻俾人叫住，原來係老師父阿Roy。師父R素來以沙田會所為飯堂，老夫老妻經常在「銀袋」打躉食西餐，少見到凱旋廳。師父R第一句就問：「鄭大班有冇搵你？」鄭大班呢排咁忙，搵左丁山做咩呀？搵神童輝密斟就話啫？師父R話：「唔好聽一啲甚麼專家、教授講，以為電台冇前景，實情係電台好有前途，美國開始數碼廣播之後，電台都唔知幾興旺，數碼廣播頻道大把，任要唔嬲，𠵱家啲電台唔肯投資啫，將來鄭大班攞咗牌嘅話，一定搞數碼廣播。」
原來師父R都認為搞新電台有行當，睇吓鄭大班有何能耐啦。再傾落去就會阻住師父R夫妻食飯，於是拜拜起身，行過兩張枱，就見到鄭大班新電台嘅股東阿瑟王與助手阿May，當然要叫聲：「校長你好！」連同阿瑟王兩兄弟，其他新電台股東有電飯煲大王M、電子大王W，呢四位都係東亞董事，商業電台老闆何老先生以前亦係東亞董事，唔知何先生會唔會向現在嘅東亞董事為新電台提供意見呢？
阿瑟王話新電台籌備需時，𠵱家冇嘢講住。星期六，好多人着便裝。阿瑟王仍然穿着整齊，三件頭西裝加袋巾，英國紳士作風不改。問佢到沙田所為何事，阿瑟王話：「返中大醫學院教書吖嘛，有八個小組，每組近三十人，跟我上外科手術，今日係最後一堂，學生話要跟我輪流合照，你話我受唔受歡迎呢？」梗受歡迎啦，佢本來就係中大外科講座教授，辭官之後，返中大客串一兩科，唔選修佢嘅科目嘅學生，若有所失喎。
傾咗一大輪，返埋自己張枱。哈，隔籬枱就係利公子與中大藝術家/文物館的教授、主管坐埋一齊。利家素來支持中大不遺餘力，利亁公子亦承傳父執輩精神，繼續下去。中大文物館收藏豐盛，利家貢獻不少也。