唉！曼城呀曼城，上期推介你哋喺英足盃砌低錫菲聯，點知……搞到我條3串1斷頭關冇得上榜首。西甲西盃始終先係我地盤，不過並唔代表畢傑英超唔掂噃！好，今期推介周六韋斯咸作客贏韋根，平手高水仲抵。畢傑
韋根近期係威係勢，我想講嘅唔係戰績，而係擴軍方面，佢哋𠵱家排喺聯賽榜18位深受降班威脅，買啲新兵返嚟可以理解嘅。韋根最近就入咗前鋒馬龍京治、柏拉西奧斯同費古路亞等人，唔明嘅係反而放走咗中場靈魂蘭沙特。
韋根3鬼拍門唔多夾
買咗新球員唔代表韋根即刻有好成績，上場作客米杜士堡，就派出咗3位黑人箭頭希斯基、賓特同馬龍京治打正選，似乎急咗啲大貪咗啲喎！首先，馬龍京治不嬲被傳有暗傷，何況新加盟默契已經唔夠，話就話打3箭頭戰術，但馬龍京治有時墮後至左中場，須知呢個唔係佢最佳位置，畀我有種「夾硬」被領隊布魯士派落場嘅感覺，最終造成反效果輸0:1收場。
鎚仔幫剛挫紅軍氣勢盛
韋根續缺2號門將拿殊及守將賴恩泰萊，但兩人非球隊正選人馬，影響固然不大。慘就慘在韋根對親倫敦球會都冇運行，對上15次交手只得5和10負未贏過，韋斯咸都係身處倫敦嘅，平手盤大家識買啦。
韋斯咸周三先對完利物浦，雖然少韋根一日時間休息，但總算憑麥克盧保完場前嘅12碼搞掂紅軍，士氣肯定好到不得了。其實韋斯咸未贏利物浦之前，我已經諗定貼佢哋周六可以擊敗韋根；睇埋對紅軍場波之後，發現「鎚仔幫」入肉攻勢唔係太多，但中路截擊力唔錯，連門將羅拔格連都打到生晒，可以繼續追。
韋斯咸呢個禮拜有比拿美復出，而養傷好耐嘅森莫亞、艾殊頓、蘇蘭奴同加比頓都已經冇問題，連原本話要收「咧」嘅戴亞亦可以跑步做簡單操練，越嚟越多人畀領隊古比士利用。穩陣計一計，周六平手盤買韋斯咸有走冇輸。
早飛王貼士
星期六16
韋根vs韋斯咸
首選：韋斯咸（平）
次選：韋根大（2.15）
冷選：韋斯咸勝3:0（34）
《周末早飛超級重心》
伯明翰護級「打」鐵趁熱
星期六11
伯明翰2:0打比郡（6.5倍）
伯明翰只餘借將中場奧賓拿一員傷兵，為護級今役對榜尾打比郡不能手軟，單W甚至[-1]的「主勝」都要捧。打比郡今周有守將尼亞坦加停賽復出，但前線入球能力弱，周中賽和曼城1:1，亦僅靠對手孫繼海擺烏龍。
布力般讓唔起拖肥糖
星期六12
布力般流浪1:2愛華頓（9倍）
布力般流浪續有守將賴恩尼爾遜及中場杜基養傷，近期入波亦多靠辛達告魯斯，面對防守穩打穩紮的愛華頓，讓唔起平/半。愛華頓今周有守將希拔停賽復出，主力如阿廸達、尼史葛及菲臘尼維利等俱可列陣，下盤筍。
雷丁保頓兄弟波和格
星期六14
雷丁1:1保頓（6.5倍）
雷丁聯賽5連敗，周中雖僅負車路士0:1，但實情只是對手胡禮菲臘斯頻頻失機所致；今仗有沙恩朗停賽復出，但另一射手傑臣日前患感冒，仍上陣成疑。保頓剛借走韋希姆臣予拉科魯尼亞，惟遇同級隊不敗率頗高，受讓要捧。