「萬人迷」碧咸近日登陸巴西，宣傳自己新起嗰間足球學校，不過鏡頭所見笑容牽強。周二佢終於用把「機械人聲」講：「我好fit㗎，隨時可以入選國家隊！」唔知惡補緊英文嘅英格蘭國家隊領隊卡比路，又知唔知「fit」字點解呢？
投銀河只正式踢過5場
碧咸心情差，應該同近日英國傳媒引述卡比路身邊人事稱，下場熱身賽對瑞士唔選呢位前隊長有關，佢透過傳媒講：「我同緊歐洲最fit球隊（阿仙奴）操練，毫無疑問我準備就緒，不過事情唔到我控制。」
我求大俠唔係針對碧咸，佢舊年7月加盟洛杉磯銀河，就一路受傷，正式踢得5場波。今個月初開始跟阿仙奴操練，冇幾耐又飛咗去非洲同巴西，點樣fit啊？如果冇肚腩就係fit嘅，61歲嘅卡比路都可以打世界盃囉！
其實，碧咸應該諗吓100次代表國家隊呢種虛榮，係咪真係咁緊要呢？既然當年選擇去美職聯，就要有心理準備淡出歐洲球壇，專心喺全球推廣足球運動。好似佢喺巴西、美國同英國開足球學校，我求大俠都不知幾高興，名利你仲嫌唔夠多咩？
不過，碧咸若然係都要集齊100頂「喼帽」，我求大俠都有一條絕橋。聽講卡比路近排英文進步唔少，碧咸大可以充當其英語教師或繙譯；而且卡比路最鍾意俄羅斯抽象畫家康定斯基，同埋聽歌劇等等，碧咸得閒咪「燒」幾隻碟，或者帶佢去睇下畫展囉！
借傳媒施壓卡帥難落台
老人家嘅嘢好易𠱁啫，𠱁得佢開心嘅話，1,000頂都有得你戴。如果吓吓透過傳媒施壓，死都要對瑞士就派你出場，卡比路點落台先？所以呢，碧咸呢單嘢，唔使急，慢慢來，各位粉絲都等吓啦！