陳冠希（Edison）出道以來緋聞女友多不勝數，以致近日網上流傳貌似他與舊愛陳文媛（BoBo）及前緋聞女友鍾欣桐的淫照後，傳聞還有不少女星將捲入事件中，但此刻在Edison心目中最在乎的，應該只有其真命女友楊永晴（Vincy）。網上淫照風波於27日晚爆發前，Edison於前兩天即上周五（25日）接受本報獨家專訪，談及女友即會心微笑，又透露因女友質疑他買桃花是想增加異性緣，雖然經Edison解釋後女友已明白只是為了增加人緣有利從商，但他也坦言今年不會買桃花，以免女友不快。Edison又自爆入行工作不開心，及近日有新花名「問題少年」，皆因他每事問。採訪：李珮洳
陳冠希自06年與楊受成姪女楊永晴相戀以來，收心養性不再緋聞纏身，他對該段情認真投入，不介意人前人後公開大讚女友。但近日有懷疑是Edison與舊愛陳文媛（BoBo）及前緋聞女友鍾欣桐（阿嬌）的合成淫照在網上流傳，事件哄動全城，未知會否動搖Vincy的心。但無論如何，Edison對Vincy一定相當在乎，他於淫照風波在27日晚爆發前，在上周五（25日）接受本報專訪時，談及女友擔心他桃花太旺，故農曆新年時不會買桃花回家，流露一副甜蜜滿足之情。
記：記者 陳：陳冠希
記：你𠵱家做咗CEO，會唔會買桃花同賀年花，希望生意興隆？
陳：桃花我唔買呀，我老竇就會買。我試過有一年買完，女朋友問我做乜買桃花，係咪嫌識女仔仲唔夠，異性緣唔夠？
分開過年
「我好尊重我女友」
記：你女友呷醋？
陳甜笑：唔係，佢唔明點解要買，佢嘅concept係桃花等於要增加異性緣，我解釋佢知桃花都可以係幫助做生意，係解人緣交際，賺好多錢，佢聽完都明咗，唔係嬲㗎。
記：新年會同女友一齊過？
陳：我要返加拿大幫阿媽搬屋，兩個家姐都返咗去，我女友唔會同我返，佢要返學，冇假期呀。
記：咁咪同唔到女友食團年飯？
陳：佢都要同自己家人食，我好尊重佢，佢喺節日要同家人過先，我會尊重佢。
其後Edison談及將於今年4月為旗下的組合農夫，在九龍灣StarHall舉辦兩場演唱會，屆時他負責幕後事宜，未決定會否上台演出。談到與農夫的合作，Edison表示會讓農夫做自己想做的事，絕不左右他們的發展，言談間重提以往當歌手做宣傳時的不滿，又自爆新花名叫「問題少年」。
記：農夫紅咗，有冇其他藝人搵你簽約？
陳：有，我推咗幾個。
記：有乜條件你先肯簽？
陳：信任我，唔好叫我簽時又話但係，一但係就知唔信我，要我捧你就要畀我幫你，要信我，冇態度冇自己諗法就唔啱喇，嗰班想發明星夢嘅唔好搵我。我做老闆唔似五十幾六十歲做唱片行幾十年習慣晒嗰班老闆，我做嘢依照本身態度。99年入行做咗5、6年先有自己滿足感，以前自己個人nosay，有嘢做就做，但個人唔開心，最驚一次收音機播我啲情歌，我好想打畀DJ叫佢掉晒啲碟，我想嘔。
滿腹牢騷
「上勁歌啜乒乓波」
記：有乜說話可以同啲新artist講？
陳：做嘢唔開心嘅話，最緊要有自己態度，否則唔止面對唔到人，連自己都面對唔到，我明白遊戲點玩，𠵱家同事都叫我問題少年，因為我有乜都問，少少嘢都問點解，以前做好多奴隸工作嘛，我唔係口響，好似學友、黎明咁唔去頒獎禮，想學佢哋，做到佢哋咁知道自己存在價值去到邊。以前好多人畀20個封面我，要我揸住隻狗影相，行埋電單車度影相，我𠵱家寧願要4本封面，但topic係同我講嘅嘢有關嘅，咁先做到宣傳。
記：你出道得好唔enjoy？做好多唔鍾意嘅騷咩？
陳：我出道6年，9成做過嘅騷都唔鍾意㗎，好多歌都唔知自己唱乜，唔知首歌講乜，直到我組織公司出碟先enjoy，所以我一定畀農夫講佢哋自己想講嘅嘢。我嘅宗旨係Igivealittle，Yougivealittle。我會畀機會佢哋，嗰時冇人畀機會我，做啲嘢好冇邏輯，我唔明點解要攞7日出嚟綵排，做就只做5分鐘表演，攞得200幾蚊酬勞，綵排7日，每日食一個lunch都嘔突啦，呢啲騷攞唔到滿足感。
記：咁點解仲要做？
陳：啲歌手係咁，呢啲騷幫唔到宣傳，件事唔係咁啱，我冇經歷呢6年，未必識咁諗去畀機會人，條路自己行，做啲嘢唔舒服，唔明點解上《勁歌》要啜乒乓波，上到去唱兩首歌，自己嗰首播MV，唔係我唱，反而叫我唱謝霆鋒啲歌。
記：有冇做過鍾意嘅騷呀？
陳：「熱格鬥」嗰個騷，同秋生、鄭融合作，我參與好多，poster都有份諗，好開心。
髮型：MoLui@ii
化妝：PoChan
場地提供：TheContinentalClub（Gateway）
娛樂資料庫--阿嬌：絕不拍裸照
日前有人先後在網上發放多張聲稱是陳冠希及鍾欣桐的淫照，阿嬌所屬的英皇娛樂集團前日已發表聲明，指相片乃合成照，並已報警備案。阿嬌2004年曾參演彭浩翔執導的電影《公主復仇記》（圖），故事講述阿嬌被戲中男友吳彥祖拋棄，劇情也有涉及網上情慾照，阿嬌同年10月到東京宣傳該片時，被問到現實中會否與男友拍裸照時，她說：「梗係唔會啦，都冇意義，男友錫自己點會唔介意俾冲印店嘅人見到女朋友嘅裸照。」
