周星馳未死傳奇之　無字頭

社會一般只有在一種情況下，會一面倒地朝拜一位明星，甚至將其不足之處合理化，歸納為風格一種──這是港台節目《不死傳奇》給我最大的啓示，傳奇是屬於死者的。
　　所以周星馳是絕無僅有的LivingLegend。蟄伏3年便引得全港傳媒前仆後繼自發大搞十幾版致敬特集！喜愛周星馳，幾乎成為香港人身份認同一部份。當全世界酷愛分字頭嗟怨你唔明我我唔明你，惟有周星馳電影，幾個字頭口徑一致，讓人夠膽買一叠飛分給阿公阿婆阿爸阿媽阿哥阿妹不怕有人悶親，家庭和睦，好在有周星馳，如此造福社會，難怪《長江7號》首映曾特首都去睇。大概繼無厘頭後又開無字頭觀眾群先河，但我無辦法，惟有六七八。

記者：劉嘉蕙
攝影：陳盛臣、劉嘉蕙

文化壽星公湯禎兆

1969年生、作家。今天生日正是《長江7號》上映日，已一早買定飛。

6字頭
星爺給我的生日禮物

《長江7號》選在1月31日上映，聽聞有一個人極度開心，他叫湯禎兆，今天39歲的湯禎兆。
為了在正日會星爺，湯禎兆連《長江》首映這個墟都冇趁，身邊朋友講戲講到烽煙四起，他忍得住，「試映開10點幾，我第二朝仲要返學。」記者求證，他淡化興奮，「反映佢喺我心目中都唔係太重要啫，不至於要我瞓少兩粒鐘。」但買了飛？「買咗。」放學即刻撲去？「唔使咁趕，一日有成6場。」嘩，開6場都記得。
他比周星馳細7歲，算是同字頭人了，周89年在《蓋世豪俠》中嶄露頭角，他那時剛入中大。「我住崇基明華堂，大學生生活一般各有各忙，不過每晚一播《蓋世豪俠》，宿舍所有人都會忽然現身，齊集大堂等追電視，是很重要的SocialEvent，每晚閒閒哋有百多人。」

最愛回魂夜

95年，是周星馳票房上的失收年，3部由劉鎮偉執導的電影全部不叫座，湯禎兆看《回魂夜》卻看得津津有味，「自己最喜歡劉鎮偉時期的周星馳，尤其《回魂夜》的角色，有一種眾人皆醉我獨醒的況味，那時我剛開始寫作，這部戲讓我有很多反思，原來一個人叻過晒全部人，看得比所有人通透，下場可能會係咁。」
由演員周星馳到導演周星馳，湯禎兆認為周星馳「技術上進步，創作上退步」，「這幾乎是所有創作人都會面對的處境，不獨是周星馳一人的問題，甚至可能不是他自身問題。以前王晶年代、李力持年代，你看得出背後有一個團隊，一班份量相當的人，日日夜夜為一句對白抝到面紅耳熱。今天如果說周星馳霸道，或者問題其實出在，仲有冇一班咁嘅人陪佢鍊呢？」簡單說，是黃金時代過去了。

■CJ7以父子情為中心，較少《功夫》及《少林足球》式群戲。

念舊影評人馮家明

1972年生、影評人。出席《CJ7》首映後新鮮滾熱辣寫了一篇影評，鬧爆。

7字頭
回到星仔時

去《長江7號》首映前，家明很興奮。
「日頭上堂，我仲周圍同人講今晚去睇《長江7號》，學生不知幾羨慕。」
結果得到一個失望的晚上。
「一路睇，我一路望錶，就完場喎，仲未見有過癮位？」他如坐針氈充滿問號。「完場後大家排隊攞電話，都係一副唔知講乜好嘅樣。返到屋企我狂上YouTube翻看周星馳舊戲，回味那無賴可愛的星仔。老實講，部戲我全冇意欲翻睇，我戥周星馳滴汗。」

唔識陳百強

愛之深責之切，7字頭的家明，是看《黑白殭屍》大的細路。
「小學時追黑白殭屍，覺得呢個哥哥好特別，不修邊幅，好似唔鍾意小朋友，但說話方式、節奏控制很有自己一套。」由小學到中學，舉凡周星馳電影上映，家明一定入戲院睇、電視重播，又睇、連周星馳上東華、做港姐嘉賓都睇幾次。「星仔時期的周星馳，是永遠都好睇，就算閒閒一站、上電視篤吓枱波，那種沙塵輕佻的感覺都很搶鏡。」
家明說，沒有幾個人像周星馳，雅俗共賞跨越時空。「普羅大眾覺得他過癮，文化人覺得他有意思。」跟新一代閒談，他更驚訝周星馳不老。「八、九十年代的巨星通常無法過渡到二千年。那天電視做《不死傳奇》廣告，講陳百強，有學生竟問我邊個係陳百強？就算李連杰、周潤發，現在還有拍戲，但新一代都覺得不關自己事。只有周星馳，坐地鐵都聽到中學生爭住認係粉絲。」

星仔跳級星爺

他喜歡星仔，乜都夠膽死，小卒碰碰撞撞變成大英雄；成為「星爺」，將大師攬上身，反而不討好。「近年看周星馳，覺得他作繭自縛，將自己推入絕路。像《少林足球》，個個一嚟就曉飛，輕易封個世界第一。《功夫》又係，講到角色天下無敵。許多電影導演，都喜歡埋下伏線，呢部戲鋪下一部戲種子，但周星馳去得太盡，變成沒後路可行。到《長江》已經要玩轉型，講溫情、加強Drama。但佢仲咁後生！」
「我很好奇，連招牌小人物變大英雄大橋都放棄，周星馳跟住仲可以點？」

粉絲變對手盧海鷹

1981年生、城大創意媒體學系一年級生。兩星期前自編自導自演周星馳對白大串燒短片參加比賽。

8字頭
「我扑過周星馳。」

跟盧海鷹（Leo）到《逃學威龍》的AdamSmithInternational影相，他即刻上身，「佢就係企呢個位。」
周星馳電影對白，他倒背如流，Yahoo舉辦周星馳短片比賽，他花兩天時間自製周星馳對白大串燒，片長7分鐘。「我們這一代個個屋企都錄電視，返屋企就煲，煲完返學校跟同學鬥背對白。」
電影電視，他知無不煲煲無不盡，《喜劇之王》訓練班出書，他都由頭到尾睇到熟，訪問中途忽然揼心，「唔記得帶本《演員的自我修養》嚟呀！」語調竟有3分似周星馳。

尹天仇真人版

他的前半段人生，基本上是喜劇之王尹天仇真人版。
Leo細細個迷李小龍與周星馳，跟着學功夫，夢想當演員。冇人拍嗎？他自拍，17歲自編自導自演短片《香港仔》，向兩位偶像致敬，拿去參賽贏了第4屆獨立短片及錄像比賽青少年組金獎。《少林足球》開戲，他帶《香港仔》去見李力持，成功獲得一角，在《少林足球》中用酒樽扑周星馳個頭。
「酒樽是膠棍外包棉花，NG了3、4次，周生叫我唔好留力，盡情扑落去。」《少》片拍了3個月，在珠海片場過集訓式生活，不用埋位時，他眼甘甘看周星馳導戲，攝位做人肉沙包讓星爺練拳。
拍完《少》片，他到處碰機會，考演藝、報無綫訓練班，統統失敗，「我唔係靚仔，在人群中不突出，好難會揀到我。」

■在《少林足球》中扑偶像個頭！

■Leo（紅圈）說周導演非常嚴肅。

我要做破壞之王

但他不放棄，不斷跑幕後，做場記、副導，《破壞之王》是他的心靈雞湯。
「《破》好勵志，講一個外賣仔，因為鍾意一個女仔，開始苦練武功，我覺得好似自己，我細個自我形象低落，惟有練武，令我有番自信。」
周星馳訪問，Leo百看不厭，「他在電視台的經歷，對我有好大勉勵作用。有一次周生見到吳孟達對住一張紙，望咗好耐，上面得幾行對白，達叔同佢講，『就係冇嘢搞，所以要望到有嘢搞。』，周生因此學到，做演員要珍惜每一次演出機會。」

■周星馳相關書籍，Leo反覆閱讀。

26歲讀Year1

他也想珍惜，不過現實是，他連演出機會都冇，與其等運到，他決定增值，26歲人入大學讀Year1，跟十八廿二同學仔上堂學拍片。多得近期短片熱，他課餘拍片放上網，被Yahoo推介，開始得到注意。來年揀主修，準備學動畫。
「即使做唔成演員都有一技傍身。」
從AdamSmith下山，小巴到達銅鑼灣，他一個箭步走去預購《長江7號》戲票了。