「123紅綠燈，過馬路要小心！」經典童年遊戲，最傳統的活動教學，教曉你基本社會Norm，見到綠燈就郁，見到紅燈就唔郁。當人人習以為常，一幫修讀媒體藝術的學生就用「郁唔郁」做主題搞藝術展，玩轉紅綠燈，綠公仔變停，紅公仔變行，誓要你反思咩叫「郁」？企定定個腦唔停算唔算「郁」？生係郁死係唔郁？我附加一題：你坐在座廁，睇緊呢份報紙，身體不動一絲，卻諗緊郁同唔郁的意思……咁到底你今日郁咗未？
記者：馮冠芝
攝影：陳陶鈞
郁≠動＝靜≠唔郁
今次「郁唔郁」媒體藝術展雖然係兼讀媒體藝術學生作品，但有Concept有策劃，絕不柴娃娃。學生負責人陳智堅指，郁唔郁概念源自媒體藝術講求與觀眾互動，「想觀眾投入，就要佢哋郁！但就算佢哋企定定睇Video，個腦都轉緊時，其實又係咪郁緊？個展覽就係想顛覆平時郁同唔郁的概念。」聞言，我決定郁吓身子，先找參展的女子，探一下他們的作品算不算靜止！
女子好郁
陀槍師姐狂郁左右「搜」
有道現今男士好吃懶做，全部由女子郁手。林嘉和的裝置藝術《左右手》就係最佳證據。身為女子的我同聲同氣，動身試玩其作品：在恍如迷宮的紅磚佈置前，用電筒射住左右感應器，電腦畫面因應左右，映出指示不同方向的標誌，我以光照左右，郁着手像搜出口，配上仿空洞的音效，真有種被困着要逃生的感覺！作品逼真，來自林嘉和的親身經歷。她正職是警察，以前巡邏體驗促使《左右手》誕生，「以前晚上行Beat，入到後巷漆黑一片，只有電筒可以引領方向。」所以作品是手也是搜。但我搜着只覺我不用動腦只動手，林嘉和之作，好郁乎？
熱力讓風繼續吹
展覽話明顛覆，似乎不止郁唔郁，連女仔係「科技白癡」的偏見也要改寫。先是林嘉和的光緣感應裝置，然後是李燕琼的《第六感傳熱》。她的作品又要我動動手，以風筒吹不同感應器，仿風筒的風車就會加快或停頓。李燕琼的作品，是郁與熱的循環，風筒暖風是風生郁動，然後促成風車轉動。我猜作品難在高科技製作，李燕琼卻說是EasyJob。原來她以前主修工程學，早已郁慣腦玩電子，我拿着風筒吹呀吹，思考到底係空氣自己郁，定我郁故我感到空氣郁？
男子吾想郁
我睇你大你睇我細
所以話現今港男以罕為貴，少爺仔愛看不動手。陳智堅的《你睇唔睇到我睇緊咩？》的裝置有兩個位睇兩段片，大人坐住睇，細路企高睇。大人看的是以小孩為視點的片段，小孩反之。陳智堅用兩個鏡頭，一高一低逛了銅鑼灣幾條街，兩段片以不同角度看同一事物，藉字幕反映大人細路兩種思緒。「好似段片拍壽司店，小孩會直接想吃，大人則思前想後。我想說做大人有太多包袱。」他解釋道。我坐喺大人個位度，不禁試試扮吓細路，身體唔郁個腦狂轉。原來少爺仔是動腦派。
在生郁住睇死
細路長大，成人老死。陳智堅講完大細，輪到王文俊的《生生生死》。一行埋去被他的攝青青燈嚇親！一張大照片掛在黑箱後，是一個置身青光，穿紅衣的女鬼。前面黑箱有小洞，望進箱內又一張被絹布包裹的「女鬼」。照片靜止卻又要人彎身窺視，照片內容講生死之意，王文俊作品絕對郁腦又郁身，「用箱窺視有種瞻仰遺容的感覺。講生死，係咪生係郁死就唔郁？」看似理所當然的答案，回頭一想，若在生行屍走肉，郁身唔郁心，確係當做唔郁好過！至於死後會否郁到好似《人鬼情未了》咁玩雕塑？我又未死，點知？
金睛火眼昅6段片
是次展覽，共1/3學生作品為動畫，佢哋話你腳唔郁但看郁腦郁畫面郁，加上靜止畫面構成「動」畫，單是媒體性質已過骨。不過短片內容都有另一層郁唔郁的深意，講人生講環保講命運。
李俊龍《動．靜》
兩邊畫面都在郁，但睇你點郁，你拋汽水罐，運轉的世界會停，你拋種子澆水，世界繼續轉動。你點郁關乎世界點郁，原來講緊環保。
張心子《開．關》
講機械人擺脫不了命運枷鎖，郁到能量耗盡也求不到他想得到的。張心子以機械人喻自己反思郁唔郁的意義。
鍾麗華《123紅綠燈》
用紅公仔演繹一個人的一生。訴說生與死，郁唔郁，只是循環。
漏網郁唔郁
我的最愛：羅嘉倫的《按我》，方形燈箱有N個按扭，要夾幾個掣開、程序準確才開得着，我郁到身水身汗都開唔着，完全體會到他以此反諷有時人手可能比機械好，只是我們都被機械寵壞。
平日愛行山的張德強的《小．自然》對大自然的體會，如作品中的水草，佔人類生活何其大。
另一個控訴科技寵壞人的作品：張一恆的《「腦」動》，我見裝置立時搞吓Mouse，按極電腦無反應，果然我如張所言，被電腦控制我郁唔郁。
羅兆榮的《交通人》拍攝一比一的交通人行行企企食飯幾味，如果真係有個全紅全綠的人在你鄰近，都咪話唔恐怖。
郁唔郁媒體藝術展
日期：即日至2月3日（11:00am-10:00pm）
地點：灣仔合和中心17M樓走廊
查詢：97769901（DorisChung）
參觀者有Say
師兄阿希大讚師弟們的作品：「最愛這個《咪郁呀！壓力忍耐測試機》，幾乎每個人見到都會企上去，體驗到自己唔郁又要備受旁人注目的壓力！」
