韓國人有時的確幾自大，好似近日阿Deep見到當地Daum討論區有個關於韓星訪日宣傳嘅討論，佢哋話日本人普遍偏矮，所以當Rain、鄭雨盛、全智賢、崔智友等巨星到日本演出節目時，都變成巨人咁高過主持成個頭，簡直嘲笑日本人生得矮喎。
撐日星較可愛
身高分別有1.84米同1.86米嘅Rain同鄭雨盛，出席午間人氣節目《笑吓無妨》時，好明顯俾觀眾睇到佢哋高主持人一個頭有多。至於全智賢拍埋去V6成員森田剛、三宅健同岡田准一時都明顯高得多，但岡田准一聲稱有1.71米，點解會同身高1.72米嘅全智賢差咁多嘅？至於身高1.86米嘅姜東元企喺原宿影相時，都顯得鶴立雞群。
網友睇到相片後都好開心，KAPACHOKO話：「證明韓國人DNA比日本人優良。」不過網友咖啡飽就話，日本男仔平均都有1.7米高，數字同韓國差唔多，只可以話韓星比一般人高。仲有網友指日星雖然矮，但比韓星較可愛，同埋比較有taste喎。
版主：網盜王尊尼Deep
本欄逢周一至五刊出
網址： http://tvzonebbs3.media.daum.net/griffin/do/phoshop/read?bbsId=A000009&articleId=212484