同事Joe姐參加豪華郵輪去歐洲，玩足30幾日！不過，佢出名「福薄」，去親旅行都唔舒服，上次坐郵輪去新加坡，返嚟病到九彩。我忍唔住提醒佢：「去咁耐，因住屋企俾人打劫呀！」佢話屋企買咗家居財物保險，冇有怕。不過，都唔係萬無一失㗎。
因為，喺MSIG保險做嘅朋友講，家居財物保險有一欄叫做「空置時間期限」，因為如果單位有人住，就算遇到火災、水災等，都有機會及早發現，涉及財物損失相對會較少；有人住嘅單位被賊爆竊嘅風險，也較無人住為低；空置時間則各保險公司不同，有達30日，有短至14日，過咗呢段空置時間有乜財物損失，可能唔賠償。
如果真係要長時間離開居所，可以同保險公司商討降低風險措施，例如，住戶可以搵親友定期到單位檢查，仲要喺管理處記錄到訪時間，萬一真係發生意外，住戶可以用啲紀錄證明單位並非長時間空置。
當講到呢度，Joe姐一個凌厲眼神講：「啋過你呀！你屋企先俾人打劫呀！」真係好心冇好報。
逢周一至周四刊出