王賢誌去年離開無綫後作出大控訴，公然炮轟陳志雲偏私，結果敢言令他人氣大升，工作接踵而來。可是，王賢誌不想變成「囉嗦怪」借鬧無綫博出位，他決定在鼠年來臨前收口，甚至跟不時發炮轟無綫的袁彌明劃清界線，免被人誤會他與她是一黨。撰文：戴彩煥
去年5月，王賢誌揮慧劍離開無綫後，工作忽然排山倒海而來，不僅是賺錢比無綫時期多好幾倍，而且見報率更比他入行13年加加埋埋還要多，一切全是王賢誌始料不及，一切一切，全是因為他膽敢站出來炮轟無綫及陳志雲的連鎖效應。
王賢誌日前接受訪問時說：「呢個係事實，但我嗰次做嗰篇訪問，唔係因為我憎TVB或者陳志雲，我只係將心裏面覺得唔滿意、唔舒服嘅感覺講出嚟，但講得太直接之後，每次記者見到我，都會問更多嘢。」
「我會盡量避忌」
王賢誌續說：「好似舊年去萬聖節party，我化咗一個半邊爛面嘅妝，結果又俾曾志偉話我爛面嗰邊係代表TVB，嗰一剎那，我發覺到原來無論我做任何嘢，啲人都會去咗嗰個point度，越講越誇張，初初啲人可能會覺得我好夠薑好型，但再講落去，啲人就會覺得我好煩，我要講嘅說話已經講晒，冇乜新嘢講，所以𠵱家我會盡量避忌一下。」
所謂避忌，包括婉拒代表亞視與無綫等電子傳媒行百萬行，以及跟不時炮轟無綫的袁彌明劃清界線。王賢誌說：「當日我出席百萬行嘅話，唔通見到TVB班舊同事都唔打招呼咩？但打招呼，咪又會俾人話我辣㷫無綫！再咁落去，莫講話其他人，連我自己都覺得王賢誌好煩，尤其是後期多咗個袁彌明，啲人會以為我哋係一黨，話我哋鬧TVB博出位，我冇諗過博出位，要博使乜等到13年先咁做？但袁彌明我唔知，所以我都同佢劃清界線。最近有人搵我同佢做一個活動嘉賓，淨係得我同佢，我唔接，錢都唔敢賺。」
亞視出手最闊綽
陳志雲過去一年曝光率爆燈，王賢誌笑言大家已經習慣：「初初覺得好奇怪，但慢慢大家已經習慣，習慣到見唔到佢嘅話，反而會覺得奇怪。」離開無綫之後，王賢誌先後為有線及亞視主持節目，論人工，王賢誌透露亞視出手最闊綽，但論資源和收視，還是無綫較勝一籌：「TVB根基太雄厚，每一個分工都好仔細，亞視就好機動，好似我做亞姐司儀，之前一早綵排好晒，等到做騷嗰日竟然全部改晒，原本嗰晚最先係佳麗着民族服裝出場，但亞視覺得唔夠震撼，改咗泳衣做第一part，原本個個佳麗都有才藝表演，但綵排時發覺好似文藝晚會咁悶到爆燈，於是又cut淨幾個，其他女仔索性着泳衣訪問，改到我有少少無所適從，佢哋會為咗做好一件事而不惜一切，但資源唔及TVB，做起事上嚟事倍功半。」
年結：驚濤駭浪
除現時主持的《電視風雲50年》稍為有口碑有收視外，王賢誌主持的《金馬獎頒獎禮》及亞姐選美節目收視也慘不忍睹，可感到失望？他笑道：「一早預咗，你以為我係乜水，唔會因為我嘅關係，突然令收視飆升到雙位數字。TVB我拍過《火舞黃沙》，收視去到30幾點，但問題係我個位置喺邊度，TVB個個節目都多人睇㗎啦，做完咁又點？反而去到亞視唔多人睇，但起碼我係亞姐司儀、係《電視風雲50年》主持！留喺TVB，咪淨係喺下晝做個《娛樂直播》！」
總結豬年，王賢誌形容是翻天覆地：「好多是非新聞、好多工作，除咗電視台同接外邊function之外，仲有幫屋企打理嘅健康食品生意，加上屋企又打緊官司，自己又第一次搬咗出去一個人住，對我嚟講，今年真係好大變化，我覺得夠嘞，希望鼠年唔好再咁驚濤駭浪啦！」
攝影：林德雄
化妝：CathyLau
髮型：AlaminofHair
