陳冠希和鍾欣桐（阿嬌）、陳文媛（BoBo）捲入互聯網的淫照風波，網上分別出現貌似三人的淫照，昨日網上更有貌似張栢芝的淫穢照片，英皇娛樂和張栢芝方面各自就事件報警備案，事件震驚全城，也成為整個娛樂圈的話題。曾和陳冠希傳過緋聞的周麗淇指太敏感要封嘴，同樣傳過和Edison拍拖的鄭融則表示最想追到發放相片的源頭，並加以懲罰。 撰文：林妃
周麗淇不想介入
「我冇睇過啲相，唔清楚呢件事，𠵱家件事已經交由警方處理，冇乜嘢可以講。我同佢傳過緋聞，呢啲嘢我控制唔到，唔係事實唔講，呢個moment咁敏感，唔好咁多揣測，最好封嘴唔講，我唔想介入件事度。」
鄭希怡冷靜拍拖
「件事公司已經交咗畀律師處理，我睇過啲相，好無聊，一啲美感都冇，我覺得好假，希望啲人唔好再做呢啲嘢。入咗呢行要好小心，我呢兩年特別小心，都係唔好講咁多，總之拍拖盡量要冷靜，影相要小心。」
鄭融追緝源頭
「Edison係有想法同埋處事認真嘅人，我同佢之前喺ClotFantasy合照，嗰張都係性感相，而平時去party就冇同佢影相。如果人哋移花接木我都阻唔到，唔好再討論啲相，我都冇興趣知，最有興趣係知道源頭去懲罰佢。」
陳法拉小心行事
「𠵱家有咗internet係好方便，但啲嘢流傳得太快，做藝人要小心啲，我選美後都被翻出未入行前嘅相。就算情侶之間都唔應該影太親密嘅相，咁會後悔。」
姚書軼自拍裸照
「無論真與假，對女仔嚟講都好大影響，我認為post上網嘅人要落地獄。自己好保守，我自己同男友咀相都好少影，不過影唔着衫嘅相我可以接受，我都試過試用豐胸產品後用手機自拍睇效果，但之後即刻delete。」
麥浚龍堅信阿嬌
「我冇睇過啲相，作為佢（阿嬌）嘅好朋友我唔會睇，呢件始終唔係一件光彩嘅事，我亦唔信有呢件事發生過。我唔會打畀佢，作為朋友唔會過問，熟佢嘅人都知係惡作劇，好無謂，而且我相信佢係堅強嘅女仔。」
黃泆潼宗教淨化
「我相信啲相係合成，我係基督徒，或者叫Edison跟我返教會。我唔覺得咁樣會增加性趣，自信係由其他方面嚟。」
謝天華睇完震驚
「我睇咗啦，好驚訝。我唔係專業攝影師，唔知係咪合成，以前Kelly、GiGi都有試過俾人移花接木，唔係新鮮事，報警都係防止啲相再流出去。」
