踏入08，距奧運又近多步，今年大家特別重視奧運，而香港仲係奧運馬術競賽嘅舉行場地㖭。舊年Audi已經事先張揚被選為北京奧運嘅高級專用車供應商，原來連香港舉行嘅馬術比賽都一樣力撐！
文、攝：梁美甜
雖然坐Audi競馬嘅一定唔係我同你喇，而係奧運選手同埋一班奧委會委員同貴賓。坦白講，我不嬲都對Audi有份情意結，總覺得德國Audi鋼水好而且又快人一步玩科技，車款可以話係結合實用功能與享受於一身，所以當知道被選為北京奧運作為御用車，完全唔覺得意外。Audi為咗隆重其事，就喺上星期五同香港奧運馬術公司舉行咗個簡單而隆重嘅簽約儀式，承諾單係香港馬術比賽就會提供80部全新A6房車，仲要係喺今年7月由德國直接運返嚟，名副其實嘅新鮮熱辣。
至於8月8日至24日期間舉行嘅北京奧運同埋9月6日至17日舉行嘅殘疾人士奧運會，Audi就會用過千部A6L、A8L、Q7嚟接載選手同埋嘉貴委員，仲要全部都係新車嚟㗎！吖，唔知比賽完咗之後，呢批仲新簇簇嘅Audi車會唔會以超筍價二手車出售呢？