前幾日上蘋果電腦網頁，見到有一欄寫住「Ready.Set.Shop」嘅紅色格仔，入面有隻老鼠仔圖案，click入去睇，原來係鼠年新春優惠，只係做今日咋，詳情冇講，淨係見到有iPod同手提電腦MacBook嘅公仔。消息人士對我講，今次優惠有啲產品可能低到65折㗎！
我即刻打電話去蘋果問，但佢哋點都唔肯講，淨係話佢哋平時好少會做呢類網上購物優惠，貨品同折扣今日先知。
我不時都有上佢哋嗰網，其中有一欄叫做Refurbishment。Refurbishment係電腦界俗稱翻新電腦，即係部機初初可能唔通過QC，但經重新改良及測試成功；另一種會係有人買咗發現唔鍾意個型號退貨，因拆過盒，電腦公司會用平啲嘅價錢賣出去。蘋果仲提供一年保養同埋免費送貨㖭。我最近都見到有一部60G嘅iPod原價3,500元減至1,158元，平咗67%。網址係 http://www.apple.com/hongkongstore。
逢周一至周四刊出