07年度意甲奧斯卡周一喺米蘭揭曉，近況麻麻嘅AC米蘭成為大贏家！除卡卡連奪最佳球員同最佳外援兩大獎外，朗拿度亦獲得最高榮譽嘅星中之星大獎（類似金針獎），當晚好耐冇上台領個人獎項嘅「肥哨」仲笑到口都合唔埋㖭。
「肥哨」呢個星中之星獎係今屆獨有，由過往10屆奧斯卡最佳球員當中選出（包括施丹等巨星），好有江湖地位㗎！難怪當晚佢一身深藍色Armani老西，加埋留咗幾個月嘅卷髮，型仔程度拍得住側邊着黑西裝、打白領呔嘅卡卡。
不過，我求大俠睇見「肥哨」領呢個獎內心都幾難受。因為呢種所謂「最高榮譽」大獎得主，通常都係高峯已過，當作最後「埋單式」嘅安慰獎啫！所謂當局者迷、旁觀者清，個獎咁金光閃閃，得獎者又邊諗得咁多呢？
國米被冷落得一個獎
彩，曾經滄海嘅朗拿度變得好踏實，仲一心諗住嚟緊周日作客費倫天拿場聯賽上陣。「各位球迷放心啦！我已經好得七七八八，對『費倫』可以預埋我！」難怪當晚大贏家卡卡接收訪問都講：「朗拿度對球隊好重要，唔可以冇咗佢！」
講番奧斯卡頒獎典禮，最佳本土球員係羅馬王子托廸（見附表），佢話上季係個人最佳賽季，今季目標就係捧歐聯。最特別係最佳門將竟然係掛咗靴嘅佩雷斯，唔通其他門將真係咁差？值得安慰嘅係，祖記門將保方繼上屆後，再次成為最受歡迎球員。
同AC米蘭一樣擁有「主場之利」嘅國米，就得馬特拉斯贏到最佳後衞獎，呢支榜首球隊認真冇面。不過講真呀！如果唔係其他勁旅處於調整期，國米好難有目前佳績，所以今次被奧斯卡冷落都係合理嘅。
意甲奧斯卡部份得獎名單
最佳球員/最佳外援：卡卡（AC米蘭）
星中之星大獎：朗拿度（AC米蘭）
最受歡迎球員：保方（祖雲達斯）
最佳本土球員：托廸（羅馬）
最佳教練：史巴利堤（羅馬）
最佳後衞：馬特拉斯（國際米蘭）
最佳門將：佩雷斯（已掛靴）