上星期三本欄寫澳門傳說有賭神，估唔到星期四就見到李八方以大篇幅追蹤報道，仲搵埋詹培忠議員呢位立法會賭神嚟證實確有澳門賭神呢回事。左丁山非常佩服李八方反應之快，夠晒拼搏精神。
澳門M睇完李八方，來電話講番元朗賭神橫掃澳門賭場之事。澳門M話：「詹培忠素來消息靈通，叻過我好多，既然佢話元朗賭神贏咗十二億元，我唔敢話冇。呢位賭神唔止贏錢叻，投資亦叻。據我啲賭場朋友消息，賭神除咗輸番一兩億之外，已動用幾億銀買咗樓，立於不敗之地，手頭上還有現金億億聲，繼續與賭場大玩特玩，輸晒就金盆洗手，印印腳返香港收租嘆世界喎。」如果係真嘅，賭神有IQ、有EQ，直情係賭仔偶像。
既然搵咗大錢，如果輸番晒出去，鬼可憐，可能枕邊人都會下堂求去。澳門M見過無數賭仔朝早大魚大肉，夜晚就問借十蚊食碗魚蛋粉頂肚，故此經常警惕自己，要留番一筆老本過世，有錢時唔好使得太盡，你估個個都係李太白咁，「天生我才必有用，千金散盡還復來」咩，千金散盡，就係「十年一覺揚州夢」之時。澳門M話：「我好耐冇去六國酒店飲茶，記得以前六國酒店有一副對聯，我留下深刻印象，𠵱家仲可以背，就係：「大包易賣，大錢難撈，針鼻削鐵，只係微中取利。同父來少，同子來多，簷前滴水，何曾見過倒流。你細心領會，就知道老來要靠自己。」
左丁山亦好耐冇去過六國，一時之間，未能證實此對聯無誤。上聯當然係六國陳述事實，謙稱自己賺錢不易，削針鼻取鐵喎，講笑咩。下聯就感嘆前人種樹後人收，老竇帶仔上茶樓多，仔帶老父上茶樓嘅話，少中又少（最多一個禮拜一次），勿望滴水會倒流！
澳門M大概有感而發，佢上有八十歲老父，下有廿幾歲兒子，上親茶樓酒店，梗係老父猛食，兒子猛飲，付鈔嘅自然係澳門M。佢好彩搵錢能力甚佳，長搵長有，久唔久揸番幾手倫敦金，就賺十萬八萬，不過呢輪玩期指，揸好倉時開淡，揸淡倉時就大升，港股過山車玩到呢位老薑殘晒，佢話要暫時休息喎。