內地廣泛地區出現雪災，利好噚日煤碳股全線上升，屯門李小姐推介中煤能源（1898），建議可於21蚊買入，目標價23蚊，睇升一成。佢話：「內地𠵱家最需要煤碳取暖，煤價嚟緊仲有得升，中煤能源嘅供應唔憂冇人要。」
對於炒煤股嘅概念，亨達集團研究部董事黃敏碩都幾睇好：「煤價最近兩個月已經升咗兩成，中煤能源集中做煤礦為主，概念上都ok！」不過佢提醒李小姐，「雖然整體煤價仲有推進空間，不過近期大陸興價格控制，擔心發改委會見升就㩒，炒煤碳股要留意有關政策風險。」
A股效應 拭目以待
李小姐補充：「中煤能源嘅利好因素，除咗煤價之外，仲有發A股嘛！聽講A股嘅認購反應唔錯。」黃敏碩就話：「近排中煤能源表現都幾波動，甚至出現高開低收嘅情況，對於A股效應係咪仲work就有啲保留。」孫柏文就提醒發A股唔代表股價實升：「睇吓中石油（857）嘅A股就知啦！」
不過李小姐對中煤能源仍然充滿信心，「佢係三隻煤碳股入面最好嗰隻。」黃敏碩都同意呢個看法：「中煤能源同中國神華（1088）一樣主要做上游業務，佢仲有母公司注資概念，如果雪災持續對佢亦會有利。」佢建議李小姐可以分兩注買入，21蚊先入一注，若股價跌穿20蚊樓下可以再入一注。
《李小姐建議》
建議買入價：$21
目標價：$23
止蝕價：$17
時間：2星期
中華煤氣（003）
進可攻退可守
近排個市咁波動，西環David推介中華煤氣（003），原因係「煤氣有公用股嘅防守性，又有地產股嘅上升概念，仲有內地天然氣項目，喺咁波動市況下簡直係一隻進可攻、退可守嘅股份。」David建議喺現價21蚊買入，揸3個月至半年，目標價睇24元，睇升14%。煤氣噚日收21蚊，升2.7%，跑贏恒指。
黃敏碩認為，煤氣業務較另外兩隻公用股中電（002）同埋港燈（006）多元化，「除咗內地燃氣同地產項目之外，煤氣仲加強緊水務嘅發展，不過純以公用股回報基準，1.5%回報似乎低咗啲！翔龍灣入賬，係煤氣今年嘅正面因素，不過22蚊係煤氣第一個阻力關口，23至24蚊亦積落唔少蟹貨，而且要小心內地燃氣業務價格控制。」
《David建議》
建議買入價：$21
目標價：$24
止蝕價：$19
時間：3個月
中油燃氣（603）
貪平入蝕大本
屯門羅小姐打嚟講中油燃氣（603），佢喺舊年11月中以0.8蚊買入，「嗰時好平，見佢反抽落嚟入咗，點知無力上。」中油燃氣噚日收報0.485元，跌3%，比羅小姐買入價跌咗近四成。
黃敏碩話：「中燃公司比較細，主要做中游設備，業務啱啱轉型，算係起步階段，利潤爆炸性方面差咗啲，盈利成效又未見，如果表現差，股價就翻唔到身，有好消息出就應該趁機出貨。」羅小姐又話：「之前炒開內地股市，近排港股上晝跟美市，下晝跟內地，港股係咪已經玩完？」
黃敏碩認為，港股有啲俾人牽住個鼻走，至於燃氣股唔係當炒，應該取大捨小，中長線可以考慮返中資金融股，亦都可以睇番防守性較強嘅基建股。
《羅小姐個案》
買入價：$0.8
目標價：─
止蝕價：─
時間：─
美聯物業（1200）
新春後新盤到
尖沙嘴溫小姐噚日推介美聯物業（1200），孫柏文認得溫小姐曾經推介過金礦股紫金礦業（2899），所以問：「你一定好信超級大通脹情況出現。」溫小姐只係一笑置之，但就解釋推介美聯嘅原因，佢話：「呢段時間通常冇乜發展商推盤，但過咗農曆新年，佢哋就會推盤，一推盤，地產代理就有生意做，咁美聯仲唔升！」
黃敏碩亦同意：「按時間表，近排發展商亦靜咗一輪，似乎蓄勢待發，喺今年排山倒海推樓盤，春節之後應有推動力。不過，除咗呢個因素，物業交投量、摩貨量、睇樓量都有增加，而且由一手樓同豪宅，擴散到二手樓及中小型樓盤，如果繼續向呢個正面方向行，會令美聯業務受益。因為成交量對美聯物業嘅盈利有槓桿效應，美聯差唔多係一隻地產股窩輪。」
溫小姐亦話：「樓價升跌，對呢隻股嚟講應該冇乜大影響，因為佢賺佣，總之有人買樓就得啦。」黃敏碩話：「𠵱家地產代理上市暫時得一間，如果你睇好呢個行業，美聯都係一個受惠分子。」
《溫小姐建議》
建議買入價：$12.68
目標價：$15
止蝕價：─
時間：3個月
恒指熊證（6484）
估插落二萬點
西貢Michael話：「今次美國減唔減息都死，睇淡恒指會去到20000點，熊證值博！」於是推介恒指瑞銀熊證（6484），呢隻熊證去到27400點先至要回收，就算呢兩日美國議息有咩好消息，都唔怕佢咁快死亡。呢隻熊證現價0.63蚊，Michael諗住睇兩個禮拜。
黃敏碩話：「其實係唔係要去到咁極端兩萬點先走，會唔會考慮中間落一落車？假設你係期貨投資者要測試個底，你覺得有咩因素可以推恒指落到呢個低位？」
Michael就話應該係一下插落二萬點，「香港已經負利率，我估銀行唔跟減息，於是拖累地產股，再拖累恒指。」孫柏文話：「兩星期要跌到二萬點，係兩日各跌2500，定係日日跌800點仲要無反彈先？」Michael就話到時先算。黃敏碩認為，個市今個月係跌多過升，要插就唔使等過年，最好有兩手準備。
《Michael建議》
建議買入價：現價
目標價：恒指2萬點
止蝕價：─
時間：兩星期
你貼股 我教路
Click入網址，即時睇 http://finance.appledaily.com
每日收市後4:30pm
歡迎Phonein28698262