賭王何鴻燊旗下嘅誠興銀行，俾工行（1398）收購，噚日喺濠江舉行慶祝儀式，賭王親自主持。工行係全球市值最大嘅銀行，誠興泊到呢個碼頭，賭王非常滿意，仲話：「做銀行最緊要水頭充足，工行多水多到直情係『水浸金山』。」喺致辭時，賭王又話，工行收購誠興，係澳門回歸後，第一次有濠江銀行俾「跨國銀行（指工行）」收購嘅經典作。
工行收購誠興
賭王多金句係人都知，佢火力亦都好充足，有老外記者問佢，美國次按對澳門賭業前景嘅影響，賭王就順水推舟，用英文回答話，澳博樣樣都做得好。不過，當記者問到一份香港西報話佢旗下公司，有份參與洗黑錢。佢就話覺得好失望，仲好㷫咁話，樣樣嘢最緊要講證據，冇證據「youbettershutup」，企喺佢兩旁嘅馬仔亦好識做，即時鼓掌撐老細。