劇集《同事三分親》嘅「住家男」黎耀祥，戲外同樣係煮餸高手，講到年近歲晚，要開始着手買海味，佢話︰「冬菇好抵食，二百蚊可以買到一斤高質冬菇慢慢嘆，所以揀冬菇我好拿手。」冬菇高手話今日要進修蠔豉速成班，跟逸東酒店逸東軒嘅譚師傅同蕭師傅學嘢，仲即興嚟場友誼賽，睇吓你揀冬菇醒，定師傅揀蠔豉勁。
記者︰劉昱蘭
攝影︰譚盈傑
日本菇香又有口感
祥仔話市面上嘅冬菇，主要來自日本同中國，佢都有見過南韓冬菇，不過始終愛日本花菇香口。「屋企人好鍾意食菇菌類菜式，所以菇通常都係主角，一定要夠香先好食，貴少少都冇所謂。」至於講到揀靚貨攻略，佢話記住以下5個重點實冇死︰
揀菇貼士
1.菇形要靚：要圓碌碌似太空館咁樣，底部菇邊綑得靚最好。
2.有紋有路：菇面紋唔一定要靚，但要紋理清晰，食落至唔韌。日本菇多數紋理清晰，圖中嘅菇紋較淺，係中國菇。
3.底要白淨：青靚白淨或個底帶淡黃都靚。
4.厚身有肉地：唔需要大隻，厚身最重要。日本菇通常厚身，所以更有口感。
5.味夠清香：要有清香菇味，如有酒酸味代表隻菇擺咗一段時間唔新鮮，好易生蟲。
祥仔貴料燜花菇
住家男當然要親自示範廚藝以示實力，今勻黎耀祥話要清清哋煮個齋，貴價冬菇配矜貴豆苗就最啱，fit晒年尾食齋菜的需要。
祥仔用老雞、赤肉、金華火腿同雞腳嚟燜冬菇，燜完嘅汁又可用嚟打芡，炒埋豆苗就可上碟。
蕭師傅：好嘢，100分！
師傅評語︰「冬菇最緊要燜得夠腍，祥仔用嚟燜冬菇嘅配料都好高級，夠入味，好好食！」
海味老闆教分菇
問問安記海味老闆潘生，專家都話祥仔揀法攞99分，要補充嘅只係菇蒂短啲屬較佳品種。不過除咗分產地，冬菇原來仲可以分6種：花菇、厚菇、寸菇、薄冬菇、中玉菇同秋寒菇。
a.花菇：最爽口，亦是最受歡迎。
b.厚菇：講明厚，當然係啖啖肉有口感啦。
c.寸菇：得1吋長好細隻，屬迷你版。
d.薄冬菇：口感少啲，但勝在快熟快腍。
e.中玉菇：比寸菇更小巧，伴菜最啱。
f.秋寒菇：產於秋季，菇身較淺色，勝在新鮮夠香。
烹調貼士
冬菇要浸軟去蒂才可煮食，厚身菇就記得要隔夜浸。冬菇煮前20分鐘，最好用生油、生粉同糖醃一醃，咁就會滑身啲，又可以去咗冬菇本身嘅木味同苦澀味。
蠔豉幼邊較少渣
祥仔講冬菇，咁逸東軒總廚譚師傅就教揀蠔豉。蠔豉主要分亁蠔同半亁濕兩種，貨源主要來自中國同日本，亦都有少少南韓貨。揀時主要睇顏色，帶青嘅就比較新鮮，最好係揀肥身嘅，聞落當然唔可以有腥味。安記海味店潘生就話仲要睇埋蠔豉個邊位夠唔夠幼，幼啲就會冇咁多渣。蠔豉肥身啲脹脹哋即係啱啱散咗春，會好食啲，但唔可以太脹，以防仲有春喺入面。
揀蠔貼士
1.要先聞一聞，有腥味就唔好揀。
2.帶青色係靚貨，深啡帶黑就唔新鮮，屬舊貨。
3.蠔豉分亁同半亁濕，亁蠔豉係生曬而成，會甘香啲，最啱煎同燜。半亁濕蠔就係曬到四至五成亁，然後汆水再風亁，所以比較滑身，打邊爐最正。
師傅出招
今勻到蕭師傅出馬煮餸，佢決定整番碟髮菜蠔豉迎戰。
師傅先用水、薑、葱、蠔油、紹酒等燜蠔豉，再加入豬手、髮菜同冬菇，加埋個芡汁便完成。
祥仔：隻蠔豉好香，豬手又夠腍，甘拜下風！
今年日本菇升兩成
潘老闆話冬菇蠔豉年年都咁多人買，因為價錢唔太貴又好意頭，兩種食材都主要係來自日本同中國。中國因為地方近啲，來貨可以比日本快兩三個月，所以都比較鮮啲，平均約$250/斤。日本貨高價少少，平均約$400/斤，但因今年天氣多雨又唔夠凍，大大影響到日本菇嘅貨量，所以價錢貴咗兩成，約升至$480/斤。