股民面對近日股市上落一、二千點已經司空見慣，噚日港股又再跌1068點，跌幅成4.25%，個市波幅咁大，大圍馮生就自嘲好水皮：「之前炒輪、炒期貨輸咗唔少錢，今次睇好招行（3968），仲買埋佢隻輪。」
馮生建議現價買入，不設止蝕價及目標價，短炒一個月。招行噚日收報28.7蚊，跌5.7%。
買輪唔好分注入
東方匯理衍生產品董事李靄欣話：「窩輪唔同正股，以輪嚟計，揸一個月太長，一個星期已經足夠，正股升你就要換過第二隻，買輪唔好分幾注入。」
噚日馮生入咗一注招行call輪（9242），佢話：「上年8月個升浪賺咗兩三皮，點知去到11月唔識走，之後輸到暈。」
孫柏文就提醒馮生，要小心招行30蚊樓上有好多蟹貨。馮生話之前去聽講座學炒股炒輪，雖然聽完一嚿雲，但一於少理，照炒可也，「四毫子買中鐵call輪之後震到暈咗，炒平保（2318）輪更輸到『阿媽都唔認得』，𠵱家想轉炒牛熊證。」
李靄欣語重心長咁話，「牛熊證𠵱家好難炒，平嗰啲好容易俾人打靶，最近個市一係就裂口高開，一係就裂口下跌，佢自動幫你打靶，仲要唔係俾人打靶就算，佢會同你計埋當日最高或最低位，條數幾襟計。」馮生聽完仲意猶未盡咁講多句，「我玩期貨都輸咗唔少錢。」李靄欣只好勸佢多啲留意財經節目，同埋注意衍生工具嘅投資風險。
《馮先生建議》
建議買入價：$28.7
目標價：－
止蝕價：－
時間：1個月
中國人壽（2628）
博反彈唔貪心
大埔關公推介中國人壽（2628），短炒博反彈，建議30蚊買入，目標價32.5蚊，睇升8%，佢話：「諗住短炒國壽，博反彈，一彈就走，自己唔貪心，目標價都唔敢定咁高，始終家陣市況唔穩定，不宜揸重貨。」國壽噚日下跌6.3%，收報31.4蚊。
李靄欣話，「30蚊入國壽都可以，但要小心，因為佢上次曾跌穿30蚊，若果當時有揸貨，你都咪話唔驚！炒都要set好止蝕價，可以喺上次低位27蚊定止蝕位。」佢提醒：「留意星期四港股，當日變化會幾大，因期指結算完咗，又啱啱知美國議息結果。」
《關公建議》
建議買入價：$30
目標價：$32.5
止蝕價：－
時間：短炒
廣船國際（317）
發盈喜憧憬注資
北角阿Ben睇好廣船國際（317），佢話：「近幾日廣船嘅股價走勢唔錯，又話發盈喜，盈利增長兩倍，加上又有注資概念，母公司有機會注入船廠，所以可以喺現價買入。」廣船噚日收報31.1蚊，揸3個月，睇升三成，目標價40蚊。
孫柏文就話：「隻廣船走勢唔錯，逆市升5.6%，𠵱家市盈率57倍，如果盈利上升一倍嘅話，市盈率就會跌番去20零倍，咁你係咪相信佢嘅盈利仲會繼續增長吖？」阿Ben好肯定咁話：「佢盈利仲會升，仲有佢嘅概念夠晒特別。」李靄欣指出：「估計都仲有機會炒多一陣，但要留意炒盈喜，一定要喺未出業績前放咗佢，因為業績公佈咗後，股價八九成都會回落。」
《Ben建議》
建議買入價：$31.1
目標價：$40
止蝕價：$25
時間：3個月
百盛集團（3368）
炒內需兼業績佳
柴灣羅先生睇好百盛集團（3368），認為百盛有內需概念，過去三年每年平均有六成增長，「舊年頭九個月嘅純利已經超過06年全年，估佢今年起碼賺6億。」羅先生建議65蚊買入，目標價睇72蚊，60蚊就止蝕，短炒至二月尾。百盛噚日收報71蚊，微跌0.2%。
孫柏文就認為百盛嘅PE（市盈率）偏高，李靄欣亦提醒：「如果美國出口有問題，有可能會影響到中國嘅內需。」佢仲話：「𠵱家參與內需股窩輪嘅人比較少，原因係內需股持貨嘅時間要長少少，唔建議大家買內需股嘅窩輪。」羅先生聽完，就問李靄欣炒內需股仲有乜地方要注意，李靄欣就話，輪商推介不能盡信，尤其要小心山埃貼士。
《羅先生建議》
建議買入價：$65
目標價：$72
止蝕價：$60
時間：至2月尾
你貼股 我教路
每日收市後下午4時半
歡迎致電28698262
http://finance.appledaily.com