散戶炒股嘅目的，其實都係希望有朝一日，可以喺股市掘到第一桶金，咁就發達喇。不過呢排個市咁波動，噚日恒指又跌千幾點，有玩開股票嘅網友就喺《香港討論區》問：「點先至可以喺股市發達？」
佢畀咗幾個選擇，包括長線價值投資、低買高沽及捉浪、即日仙、窩輪，同埋期指。好多人都知，長線投資嘅回報一般嚟講最好，所以有30個網友揀長線價值投資，佔四成。跟住按次序係窩輪（20%）、低買高沽及捉浪（16%）、期指（15%），網友覺得最難發達嘅應該係玩即日仙，只得7個人揀，佔一成都冇。
不過，網友道理仔留言話：「未聽過買股票會發達喎！」熊貓吮吮提醒，「唔好玩期指同窩輪，等同送死！想發達要算吓條命先。」四叔粉絲南星嘅方法好簡單，「聽四叔話入邊隻，就買邊隻。」water9394講咗個人人皆知嘅方法，「低買高沽……方法就話咗畀你知，做唔做到就睇你喇。」