喺美國上市，內地最大嘅互聯網搜尋器百度，創辦人兼行政總裁李彥宏啱啱減持咗公司股權。根據美國證券交易所前日公佈嘅文件顯示，李彥宏嘅百度持股量減至16.35%。
百度上市時，李彥宏持有25.8%股權，後尾過咗上市禁售期，佢即時減持套現，持股量降至22.4%，家陣佢進一步減持股權，唔通佢覺得公司股價見頂？
百度05年美國掛牌，當時招股價27蚊美金，去年11月，股價曾一度急升到429.19蚊美金，雖然家陣股價回軟，跌到落291.32蚊美金，但同招股價相比，足足勁升近9.8倍，認真犀利。以李彥宏𠵱家嘅16.35%股權計算，身家達16億美金。
雖然𠵱家百度市值達100億美金，約780億港銀，但同阿里巴巴（1688）嘅1026億港銀相比，仍差一大截。
家吓李彥宏減持百度股權，唔知馬雲遲吓會唔會有樣學樣呢？不過，點都要等上市禁售期過咗先啦。