坐完十幾個鐘頭飛機，我哋一行傳媒終於嚟到西班牙巴塞隆拿（Barcelona），今趟公幹跟過往有別，目的並非試新車，而係實地體驗福士最新的波箱科技。由於到埗時間係當地晚上接近12時，加上長時間嘅舟車勞頓，令大家渴望快啲去到酒店，放低行李之後即刻倒頭大睡……
第二日大清早，就要為試駕配用最新7前速DSG波箱嘅Volkswagen新車作好準備；但所謂嘅準備，都係食個豐富又好味嘅早餐啫！之後見仲有時間，就喺酒店附近行嚟行去，睇吓有咩特別嘢，正因為咁，我發覺到酒店嘅設計同周遭嘅建築物相比，實在年輕有個性得多。
行多幾步去到酒店正門，睇到有唔少全新Volkswagen車款泊晒喺度，無論Tiguan定係Touran，又或者係好受歡迎嘅新一代Golf都有，感覺同走咗入去Volkswagen陳列室一樣，幾乎要睇咩車有咩車，爽喎！
記者：鄭達基