影衰晒香港男士嘅某影星，終於讓出保持咗9年嘅「第一賤男」地位，取而代之嘅係車路士球星艾殊利高爾（A高）。乜話？唔信有人咁賤？咁就聽我求大俠慢慢講啦！
真係好睇過戲，A高上周四被《太陽報》踢爆同22歲少女艾美有染，後來慘被老婆摑一巴後，該報周一繼續爆料話女方好可能有咗！原來個衰佬3次風流都冇做足安全措施，知道「大」禍後先打電話同艾美道歉：「XX啦！真係sorry呀！Sxxt!」之後就派第3者約對方喺酒吧攤牌。
搞大人個肚 仲要人落仔
艾美透露當晚嗰位代表好無情咁講：「A高有個快樂家庭，同呢個『種』冇關。佢希望你盡快落咗佢，錢嘅嘢你唔使擔心，我哋包！」之後仲利誘：「只要你安靜過日子，我哋會保證你快樂！」
再有人稱與賤男有染
嗰位代表突然面色一沉繼續講：「不過如果你想生佢落嚟，我亦唔會冇表示……」仲刻意用好沉嘅聲講：「我絕對唔會就咁算！」當艾美好堅決咁講唔稀罕錢，對方嘿一聲回答：「你係咪百萬富翁？（回答：唔係），咁你咪要人幫手囉！」
據講A高老婆雪露私底下向老公大興問罪之師，但喺人面前就死撐丈夫冇做過，仲鬧艾美係貪慕虛榮嘅妓女。艾美就反擊話：「我哋搞緊嗰陣，有幾個隊友衝入房講一輪嘢，雪露大可以去問佢哋！請搞清楚講大話嘅係你老公！」
事到如今邊個係衰人好清楚。件事仲有餘波，噚日《太陽報》就披露23歲金髮模特兒布洛克，承認同A高有過一夕風流，事後有神秘人醒佢6,000鎊（約92,000港元），仲喺一份正式文件簽名表示冇同對方有超友誼關係。話A高係世紀賤男，冇人反對啩？