今日思捷環球（330）公佈中期業績，原本公佈業績對上市公司嚟講，係一件好平常嘅事，但原來今次係思捷喺93年上市以嚟，第15次公佈中期業績，即係話今年就係上市15周年。咁仲唔止，今年仲要係思捷品牌誕生40周年！上佢公司個網站，仲可以搵到回顧40年品牌歲月嘅圖片故事。
68年喺美國三藩市出世嘅思捷，當時只係地道品牌，主打少女市場。經過一輪發展，70年代營業額升到7.8億港銀，之後開拓日後成為主要增長點嘅德國同亞洲市場。93年思捷嘅亞洲業務上市，跟住邢李㷧成功控制埋美國同歐洲嘅業務，02年終於統一全球思捷品牌。
37年營業額升30倍
時至今日，思捷嘅全年營業額，經已增加到超過300億港銀，足足係70年代時嘅30幾倍，相信邢生見到有咁嘅成績，都可以老懷安慰矣。
